چوہدری انوارالحق سے روس میں مقیم سینئر صحافی اشتیاق ہمدانی کی ملاقات ،ہٹیاں بالا میں جاری عوامی مشکلات ،بنیادی سہولیات کمی سے آگاہ کیا

منگل 12 اگست 2025 22:40

اسلام آباد (اُردو پوائنٹ اخبارتازہ ترین - این این آئی۔ 12 اگست2025ء)آزادجموں وکشمیر کے وزیراعظم چوہدری انوارالحق سے روس میں مقیم سینئر کشمیری صحافی اشتیاق ہمدانی نے ملاقات کی اور ہٹیاں بالا میں جاری عوامی مشکلات اور بنیادی سہولیات کی کمی سے آگاہ کیا۔ ملاقات میں علاقے کے مسائل، جن میں پانی کی فراہمی، بجلی کی قلت، برساتی نالوں کی صفائی اور دریا کے کٹاؤ جیسے اہم امور شامل ہیں، پر تفصیلی بات چیت کی گئی۔

اشتیاق ہمدانی نے وزیراعظم کو آگاہ کیا کہ ہٹیاں بالا کے شہری گزشتہ پانچ دنوں سے پانی کی فراہمی سے محروم ہیں، جس پر وزیراعظم آزاد کشمیر نے شدید برہمی کا اظہار کیا۔ فوری ایکشن لیتے ہوئے وزیراعظم نے چیف انجینئر پبلک ہیلتھ مظفرآباد ڈویژن کو ہدایت کی تین دن کے اندر اس حوالے سے جامع رپورٹ پیش کی جائے۔

(جاری ہے)

اس کے ساتھ ساتھ ڈپٹی کمشنر جہلم ویلی سے بھی اس معاملے پر تفصیلی رپورٹ پیش کرنے کی ہدایت کی گئی۔

اشتیاق ہمدانی نے اس موقع پر وزیراعظم کو روسی زبان میں مرتب کردہ ایک خصوصی کتابچہ پیش کیا، جو مسئلہ کشمیر سے متعلق عالمی آگاہی کے لیے تیار کیا گیا ہے۔ انہوں نے تجویز دی کہ ایسے معلوماتی کتابچے دنیا کی مختلف زبانوں میں شائع کر کے عالمی سطح پر مسئلہ کشمیر کے مؤقف کو مؤثر انداز میں اجاگر کیا جائے۔ وزیراعظم نے اس تجویز کو سراہتے ہوئے اسے قابلِ عمل قرار دیا۔بعدازاں وزیراعظم آزاد کشمیر انوار الحق نے اشتیاق ہمدانی کے بھائی عاشق ہمدانی کی وفات پر گہرے رنج و غم کا اظہار کیا اور مرحوم کے ایصالِ ثواب کے لیے فاتحہ خوانی کی۔اس موقع پر ڈائریکٹر جی ٹی وی سید قیوم بخاری،اینکر پرسن خواجہ متین،صحافی رضوان عباسی، رئیس احمد خان،یوسف ہمدانی اور دیگر بھی موجود تھے۔