پی ٹی اے کا سائبر ریزیلینس ورکشاپ اور ٹیلی کام سائبر سکیورٹی ایوارڈز کا انعقاد،ڈیجیٹل سکیورٹی سے متعلق چیلنجز پر تفصیلی تبادلہ خیال

منگل 12 اگست 2025 22:10

اسلام آباد (اُردو پوائنٹ اخبارتازہ ترین - اے پی پی۔ 12 اگست2025ء) پاکستان ٹیلی کمیونیکیشن اتھارٹی (پی ٹی اے) نے ہواوے کے تعاون سے ’’نیکسٹ جنریشن سائبر ریزیلینس ورکشاپ‘‘ اور ’’ٹیلی کام سائبر سکیورٹی ایوارڈز برائے سال 2025‘‘ کا انعقاد کیا جس میں سینئر سرکاری عہدیداران اور سائبر سکیورٹی ماہرین نے شرکت کی۔ اس موقع پر ڈیجیٹل سکیورٹی سے متعلق چیلنجز پر تفصیلی تبادلہ خیال کیا گیا۔

ورکشاپ میں پاکستان میں متوقع فائیو جی کے اجرا، لو ارتھ آربیٹ (ایل ای او) سیٹلائٹ انٹرنیٹ، مصنوعی ذہانت (اے آئی) کے استعمال اور فِن ٹیک کے پھیلاؤ کے سائبر سکیورٹی اثرات پر بات چیت کی گئی۔ پی ٹی اے نے مقامی و بین الاقوامی شراکت داروں کے ساتھ مل کر استعداد کار میں اضافہ، معلومات کے تبادلے اور جدید محفوظ حل کی ضرورت و اہمیت کو اجاگر کیا ۔

(جاری ہے)

اس موقع پر وفاقی وزیر برائے آئی ٹی و ٹیلی کام شزہ فاطمہ خواجہ نے پی ٹی اے کی کارکرگی کو سراہتے ہوئے کہا کہ سائبر ریزیلینٹ پاکستان کی تشکیل صرف ٹیکنالوجیکل ترجیح نہیں بلکہ قومی ضرورت ہے، حکومت جدید حل اور مضبوط حفاظتی اقدامات کی بھرپور حمایت کرتی ہے تاکہ ہمارے ڈیجیٹل ایکو سسٹم کو محفوظ بنایا جا سکے۔چیئرمین پی ٹی اے میجر جنرل (ر) حفیظ الرحمٰن نے کہاکہ سائبر ریزیلینس ہمارے ڈیجیٹل مستقبل کی بنیاد ہے، پی ٹی اے ایک محفوظ ڈیجیٹل پاکستان کے لئے تعاون اور جدت کے فروغ کا سفر جاری رکھے گا۔تقریب کے اختتام پر سائبر سکیورٹی میں جدت، پائیداری اور قیادت کے شعبوں میں نمایاں کارکردگی کا مظاہرہ کرنے والوں کو ایوارڈز دیئے گئے۔