پنجاب کے سکولز کیلئے گرمیوں کی چھٹیاں بڑھانے کے فیصلے میں تبدیلی

پہلی سے آٹھویں جماعت تک کلاسز یکم ستمبر سے شروع ہوں گی، فیصلے کا اطلاق نجی و سرکاری تعلیمی اداروں پرہوگا

ساجد علی بدھ 13 اگست 2025 15:54

لاہور ( اُردو پوائنٹ اخبارتازہ ترین۔ 13 اگست 2025ء ) پنجاب کے سکولز کیلئے گرمیوں کی چھٹیاں بڑھانے کے فیصلے میں تبدیلی کردی گئی۔ میڈیا رپورٹس کے مطابق پنجاب حکومت نے سکولوں کی چھٹیاں بڑھانے کے فیصلے میں تھوڑی سی تبدیلی کی ہے، جس کے تحت نویں دسویں جماعت کے طلباء کیلئے سکولز 18 اگست سے کھل جائیں گے، اسی طرح او لیول، اے لیول اور انٹرمیڈیٹ کی کلاسز بھی 18 اگست سے شروع ہوں گی اس کےعلاوہ انٹرمیڈیٹ کی کلاسزکا آغاز بھی 18 اگست سے ہوگا، تاہم پہلی سے آٹھویں جماعت تک کلاسز یکم ستمبر سے ہی شروع ہوں گی، اس فیصلے کا اطلاق نجی و سرکاری تعلیمی اداروں پرہوگا، وزیرتعلیم رانا سکندر حیات کا کہنا ہے کہ فیصلے میں تبدیلی تعلیمی ماہرین سے مشاورت کے بعد کی گئی۔

یاد رہے کہ محکمہ تعلیم پنجاب نے سکولوں میں موسم گرما کی چھٹیوں میں اضافے کا اعلان کیا ہوا ہے، وزیرتعلیم رانا سکندر حیات کا کہنا تھا کہ پنجاب بھر میں تمام سکول اب یکم ستمبر کو کھلیں گے، گرمی کی شدید لہر کے باعث یہ فیصلہ ناگزیر تھا، یہ بات درست ہے کہ اس توسیع سے طلباء کے تعلیمی سلسلے میں تعطل پیدا ہوگا، تاہم بچوں کی صحت اور سلامتی حکومت کی اولین ترجیح ہے اور بڑھتی ہوئی درجہ حرارت کی صورتِ حال میں بچوں کو اسکول بلانا خطرناک ثابت ہو سکتا ہے۔

(جاری ہے)

دوسری طرف آل پاکستان پرائیویٹ سکولز مینجمنٹ ایسوسی ایشن نے گرمیوں کی چھٹیوں میں 31 اگست تک توسیع کو بلاجواز قرار دے دیا، ایسوسی ایشن نے فیصلہ واپس لینے کا مطالبہ کرتے ہوئے کہا کہ اسلام آباد میں نجی تعلیمی ادارے4 اگست سے کھل چکے ہیں، ملک کے دیگرصوبوں میں بھی تعطیلات کے بعد سکولوں میں تعلیمی سرگرمیوں کا آغاز ہو گیا ہے، بچوں کوتین ماہ تعلیم سے دور رکھنا ان کے مفاد میں نہیں ہے، چھٹیوں میں توسیع سے میٹرک کی کلاسز بری طرح متاثر ہوں گی، جس کے پیش نظر آل پاکستان پرائیویٹ سکولز ایسوسی ایشن کی جانب سے صوبائی وزیر تعلیم رانا سکندرحیات سے تعطیلات میں توسیع کے فیصلے پر نظرثانی کا مطالبہ کیا گیا۔