مسلح افواج اور عوام کے اُس عزم و حوصلے کو سراہتا ہوں جنہوں نے مل کر ہماری خودمختاری کا دفاع کیا، نائب وزیراعظم و وزیر خارجہ سینیٹر اسحاق ڈار

اسلام آباد (اُردو پوائنٹ اخبارتازہ ترین - اے پی پی۔ 14 اگست2025ء) نائب وزیراعظم و وزیر خارجہ سینیٹر اسحاق ڈار نے پاکستان کے 79ویں یومِ آزادی کے موقع پر پوری قوم کو دلی مبارکباد پیش کرتے ہوئے کہا ہے کہ مسلح افواج اور عوام کے اُس عزم و حوصلے کو سراہتا ہوں جنہوں نے مل کر ہماری خودمختاری کا دفاع کیا، قائداعظمؒ کے وژن کے مطابق، پاکستان باہمی احترام، علاقائی سکون اور امن پر مبنی سفارتکاری کے اپنے عزم پر قائم ہے۔

آج ہم یہ عہد دہراتے ہیں کہ پاکستان کے عالمی وقار کو مزید بلند کریں گے۔ ترجمان دفتر خارجہ کی جانب سے جاری بیان کے مطابق پاکستان کے 79 ویں یومِ آزادی کے موقع پر اپنے پیغام میں نائب وزیراعظم و وزیر خارجہ نے کہا کہ میں پوری قوم کو دلی مبارکباد پیش کرتا ہوں اور ہم سب کے آبائو اجداد کو خراجِ عقیدت پیش کرتا ہوں جن کی لازوال قربانیوں اور حق کی راہ میں ثابت قدمی سے پاکستان معرضِ وجود میں آیا۔

(جاری ہے)

نائب وزیراعظم و وزیر خارجہ نے کہا کہ میں اس عزم کو دہراتا ہوں کہ جب تک ہم "لا الہ الا اللہ محمد رسول اللہﷺ" کے پرچم تلے متحد ہیں کوئی طاقت ہمیں شکست نہیں دے سکتی ،انہوں نے کہا کہ حالیہ آزمائشوں کے پس منظر میں میں اپنی مسلح افواج اور عوام کے اُس عزم و حوصلے کو سراہتا ہوں جنہوں نے مل کر ہماری خودمختاری کا دفاع کیا۔ یہ اجتماعی ثابت قدمی نہ صرف ہماری عسکری تیاری کا مظہر ہے بلکہ ایک اصولی اور موثر خارجہ پالیسی کی عکاسی بھی کرتی ہے، جس نے پاکستان کو عالمی سطح پر وسیع حمایت دلائی۔

سینیٹر اسحاق ڈار نے کہا کہ قائداعظمؒ کے وژن کے مطابق، پاکستان باہمی احترام، علاقائی سکون اور امن پر مبنی سفارتکاری کے اپنے عزم پر قائم ہے۔ آج ہم یہ عہد دہراتے ہیں کہ پاکستان کے عالمی وقار کو مزید بلند کریں گے، اپنے اسٹریٹجک اور معاشی مفادات کو آگے بڑھائیں گے اور ایک پُرامن ہمسائیگی کو فروغ دیں گے۔نائب وزیراعظم و وزیر خارجہ نے کہا کہ یومِ آزادی اور معرکہ حق کا یہ دن ہمیں یاد دلاتا ہے کہ آزادی کے تحفظ کے لئے نہ صرف سرحدوں کا دفاع بلکہ سچائی، انصاف اور وقار کے اصولوں کو عالمی تعلقات میں برقرار رکھنا بھی ضروری ہے۔

انہوں نے کہا کہ ہماری خارجہ پالیسی پاکستان کو ایک ذمہ دار، امن پسند جمہوری ملک کے طور پر پیش کرتی رہے گی، جو شراکت داری قائم کرنے، مکالمے کے ذریعے تنازعات حل کرنے اور ایک مستحکم و خوشحال خطے کی تشکیل میں فعال کردار ادا کر رہی ہے۔ نائب وزیراعظم و وزیر خارجہ اسحاق ڈار نے کہا کہ میں ہر شہری سے اپیل کرتا ہوں کہ آج بھی اور آنے والے وقتوں کے لیے بھی متحد رہیں، جمہوری اقدار کی حفاظت کریں اور ایک مضبوط، باوقار اور خوشحال پاکستان کی تعمیر میں اپنا کردار ادا کریں ۔ آپ سب کو جشن آزادی مبارک! پاکستان زندہ آباد ـ