خیبرپختونخواہ میں دہشتگردوں کے حملے، 5 پولیس اہلکار شہید 7 زخمی

پشاور کے ناصر باغ میں پولیس پوسٹ سخی پل، بنوں میں خوجڑی اور مزنگا پولیس پوسٹس، اور چارسدہ و ٹانک میں پولیس چوکیوں پر حملے سیکیورٹی فورسز اور عوام کے تعاون سے پسپا کیے گئے؛ آئی جی خیبرپختونخواہ

ساجد علی جمعرات 14 اگست 2025 12:50

خیبرپختونخواہ میں دہشتگردوں کے حملے، 5 پولیس اہلکار شہید 7 زخمی

پشاور ( اُردو پوائنٹ اخبارتازہ ترین۔ 14 اگست 2025ء ) صوبہ خیبرپختونخواہ میں دہشت گردوں کے حملوں میں 5 پولیس اہلکار شہید اور 7 زخمی ہوگئے۔ میڈیا رپورٹس کے مطابق خیبر پختونخواہ کے مختلف علاقوں میں گزشتہ 24 گھنٹوں میں دہشت گردوں کی جانب سے کیے جانے والے مختلف حملوں میں 5 پولیس اہلکار شہید ہوگئے، پولیس حکام کا کہنا ہے کہ اپر دیر، لوئیر دیر اور پشاور میں دہشت گردوں نے پولیس کو نشانہ بنایا، اپر دیر میں پولیس موبائل پر حملے میں 3 اہلکار شہید اور 3 زخمی ہوئے، لوئیر دیر کے علاقے لاجبوک میں پولیس چوکی پر حملے میں ایک کانسٹیبل شہید ہوا جب کہ پشاور کے تھانہ حسن خیل پر حملے میں ایک اہلکار شہید اور ایک زخمی ہوا، پشاور میں دو دیگر پولیس چوکیوں پر بھی حملے ناکام بنائے گئے۔

اس حوالے سے آئی جی خیبر پختونخواہ ذوالفقار حمید نے بتایا کہ پشاور کے ناصر باغ میں پولیس پوسٹ سخی پل، بنوں میں خوجڑی اور مزنگا پولیس پوسٹس، اور چارسدہ و ٹانک میں پولیس چوکیوں پر حملے سیکیورٹی فورسز اور عوام کے تعاون سے پسپا کیے گئے، دہشت گردوں کے بزدلانہ حملوں کا ڈٹ کر مقابلہ کیا گیا اور بہادر جوانوں نے ایک بار پھر ثابت کیا کہ خیبر پختونخواہ پولیس ہر وقت الرٹ ہے۔

(جاری ہے)

ادھر پاراچنار کے نستی کوٹ گاؤں میں مطلوب ملزم کی گرفتاری کے لیے پولیس اور سکیورٹی فورسز نے مشترکہ چھاپہ مارا، اس دوران فائرنگ کے تبادلے میں ایڈیشنل ایس ایچ او روضہ سٹیشن قیصر حسین جام شہادت نوش کر گئے، پولیس ذرائع کا کہنا ہے کہ اس کارروائی میں بھاری نفری موجود تھی تاہم ڈی پی او کرم یا کسی دیگر اعلیٰ افسر کی جانب سے تاحال کوئی باضابطہ بریفنگ جاری نہیں کی گئی، علاقے میں گزشتہ دو دنوں میں نامعلوم افراد کے ہاتھوں دو افراد قتل ہوئے تھے۔