14 اگست آزادی کے حصول کے لیے آباو اجداد کی عظیم قربانیوں کی یاد دلاتا ہے،عاطف اکرام شیخ

جمعرات 14 اگست 2025 17:31

اسلام آباد (اُردو پوائنٹ اخبارتازہ ترین - اے پی پی۔ 14 اگست2025ء) فیڈریشن آف پاکستان چیمبرز آف کامرس اینڈ انڈسٹری ( ایف پی سی سی آئی ) کے صدر عاطف اکرام شیخ نے قوم کو 78 ویں یوم آزادی کی مبارکباد دیتے ہوئے کہا ہے کہ یہ دن آزادی کے حصول کیلئے ہمیں اپنے آباو اجداد کی عظیم قربانیوں کی یاد دلاتا ہے،پرامن اور جمہوری جدوجہد کے ذریعے پاکستان کا قیام تاریخ کا ایک بے مثل اور بے نظیر باب ہے۔

انہوں نے کہا کہ پاکستان کیلئے ان گنت قربانیاں دینے والے تحریک ِپاکستان کے رہنماوں، کارکنان اور اپنے آباو اجداد کو خراج ِعقیدت پیش کرتے ہیں۔ عاطف اکرام شیخ نے کہا کہ آپریشن بنیان مرصوص اور معرکہ حق میں تاریخی فتح نے اس مرتبہ آزادی کی خوشیوں کو دوبالا کر دیا ہے اور بھارت کے ساتھ جنگ نے پوری قوم کو متحد کردیا ہے ۔

(جاری ہے)

صدر ایف پی سی سی ائی نے کہا کہ ایف پی سی سی آئی سمیت ملک بھر کی بزنس کمیونٹی افواج پاکستان کی عظیم قربانیوں کی معترف ہے۔

انہوں نے کہا کہ معرکہ حق کے بعد اب ہمیں معاشی میدان میں بھی اپنی صلاحیتوں کا لوہا منوانا ہے۔ انہوں نے کہا کہ آج کے دن ہم عہد کرتے ہیں کہ بہتر فیصلے کرکے ملک کومعاشی ترقی کی راہ پر گامزن کرینگے۔ عاطف اکرام شیخ نے کہا کہ معاشی طور پر ایک مضبوط ملک بن کر ہی ہم اصل آزادی حاصل کر سکتے ہیں۔