معرکۂ حق میں حصہ لینے والے شہدا اور غازیوں کو ایوارڈ دیئے گئے ہیں، وفاقی وزیر قانون

جمعہ 15 اگست 2025 13:29

اسلام آباد (اُردو پوائنٹ اخبارتازہ ترین - اے پی پی۔ 15 اگست2025ء) وفاقی وزیر قانون سینیٹر اعظم نذیر تارڑ نے کہا ہے کہ معرکۂ حق میں حصہ لینے والے شہدا اور غازیوں کو ایوارڈ دیئے گئے ہیں۔جمعہ کو ایوان بالا کے اجلاس میں انہوں نے کہا کہ الحمد للّٰہ اس جنگ میں ہمارے بہت کم فوجی افسران اور اہلکار شہید ہوئے۔ اس کے ساتھ ہی اُن افراد کو بھی ایوارڈ دیئے گئے ہیں جن کے گھر اس جنگ کے دوران تباہ ہوئے۔

(جاری ہے)

وفاقی وزیر قانون نے کہا کہ اس موقع پر میں سمجھتا ہوں کہ ہمیں دل بڑا کرنا چاہیے اور تمام طبقات کی قربانیوں کو سراہنا چاہیے۔انہوں نے مزید کہا کہ قائداعظم کی تصویر نہ چھاپنے کے حوالے سے یہ بات اُن کے علم میں اب آئی ہے، اور اس پر اُن کی بھی دل آزاری ہوئی ہے۔ انہوں نے یقین دہانی کرائی کہ اس معاملے کی باقاعدہ انکوائری کی جائے گی اور ایوان کو مکمل طور پر آگاہ کیا جائے گا۔وفاقی وزیر قانون نے جشنِ آزادی کے موقع پر مختلف اداروں کی طرف سے جاری اشتہارات کا ذکر کرتے ہوئے کہا کہ ہم سب بانیٔ پاکستان کا احترام کرتے ہیں، اس کاروان کے میرِ کارواں قائداعظم محمد علی جناح ہیں اور آپ ہی ہمارا فخر ہیں۔