پنجاب ایکسائز، ٹیکسیشن اینڈ اینٹی نارکوٹکس ڈیپارٹمنٹ نے یومِ آزادی بھرپور جوش و جذبے سے منایا

جمعہ 15 اگست 2025 18:26

لاہور (اُردو پوائنٹ اخبارتازہ ترین - این این آئی۔ 15 اگست2025ء)حکومتِ پنجاب کی ہدایت کے مطابق ایکسائز، ٹیکسیشن اینڈ اینٹی نارکوٹکس ڈیپارٹمنٹ نے یومِ آزادی ملی جوش و خروش اور جذبہٴ حب الوطنی کے ساتھ منایا۔ صبح 8 بجے ایڈمنسٹریٹو ڈیپارٹمنٹ میں پرچم کشائی کی پروقار تقریب منعقد ہوئی، جب کہ اسی نوعیت کی تقریبات ڈائریکٹوریٹ جنرل ایکسائز اینڈ ٹیکسیشن اور صوبے بھر میں کاؤنٹر نارکوٹکس فورس کے دفاتر میں بھی ہوئیں۔

اس موقع پر ایڈیشنل سیکرٹری سحرش سعد نے اپنے خیالات کا اظہار کرتے ہوئے کہا کہ یہ تقریبات ہمارے افسران اور عملے کی وطنِ عزیز سے گہری محبت اور قومی خدمت کے غیر متزلزل عزم کی عکاس ہیں۔ انہوں نے کہا کہ ہمارے دفاتر قومی پرچم کے رنگوں سے سجے ہوئے تھے اور ہر فرد میں اتحاد اور حب الوطنی کا جذبہ نمایاں تھا۔

(جاری ہے)

محترمہ سحرش سعد نے مزید کہا کہ محکمہ اپنی قومی وابستگی صرف تقریبات تک محدود نہیں رکھتا بلکہ روزمرہ کی ذمہ داریوں کی ادائیگی میں بھی بھرپور ثابت قدمی سے نظر آتا ہے۔

ایکسائز اینڈ ٹیکسیشن کے شعبے میں مؤثر ٹیکس وصولی کے ذریعے قومی معیشت کو مضبوط بنانے کے لیے مسلسل کوششیں جاری ہیں۔ اینٹی نارکوٹکس وِنگ معاشرے کو منشیات کے ناسور سے بچانے کے لیے منظم اور بھرپور جدوجہد میں مصروف ہے۔انہوں نے کہا کہ ہمارے دونوں وِنگز عزم، دیانت داری اور اٹوٹ حب الوطنی کے ساتھ قوم کی خدمت میں مصروف ہیں۔ آخر میں انہوں نے وطن کے لیے جانیں قربان کرنے والے شہداء کو خراجِ عقیدت پیش کیا اور شہریوں سے اپیل کی کہ وہ ایک مضبوط اور خوشحال پاکستان کے لیے متحد ہو کرکام کریں۔