پنجاب میں چینی سٹاک کی وافر دستیابی، قلت بارے خبریں بے بنیاد ہیں،صوبائی سیکرٹری پرائس کنٹرول

جمعہ 15 اگست 2025 20:20

لاہور (اُردو پوائنٹ اخبارتازہ ترین - اے پی پی۔ 15 اگست2025ء) صوبائی سیکرٹری پرائس کنٹرول ڈاکٹر احسان بھٹہ کی زیر صدارت ڈسٹرکٹ فوڈ کنٹرولرز کا بذریعہ ویڈیو لنک اجلاس ہوا۔کین کمشنر پنجاب نوید شہزاد مرزا نے مختلف ڈویژن میں فراہم کردہ چینی سٹاک کی تفصیلات بارے آگاہ کیا۔

(جاری ہے)

گزشتہ دو روز میں عام مارکیٹ اور صنعتی استعمال کیلئے 3 لاکھ 1823 میٹرک ٹن چینی فراہم کی جا چکی ہے، پچھلے 24 گھنٹوں میں لاہور ڈویژن کیلئے 1075 میٹرک ٹن، گوجرانولہ ڈویژن کیلئے 807 میٹرک ٹن چینی فراہم کی گئی ہے،سرگودھا ڈویژن کیلئے 1108, راولپنڈی 768 جبکہ ساہیوال کیلئے 330 میٹرک ٹن چینی سٹاک فراہم کیا جاچکا ہے،بہاولپور ڈویژن میں 4 ہزار 206، ڈی جی خان 2 ہزار 541، فیصل آباد ڈویژن 3 ہزار 288 جبکہ ملتان ڈویژن میں 979 میٹرک ٹن چینی کی فراہمی یقینی بنائی جا چکی ہے۔

اس موقع پر سیکرٹری پرائس کنٹرول نے چہلم اور عرس کے آخری روز عام مارکیٹ میں کڑی نگرانی کی ہدایت بھی کی ۔ڈاکٹر احسان بھٹہ نے کہا کہ پنجاب بھر میں چینی سٹاک کی وافر دستیابی، قلت بارے خبریں بے بنیاد ہیں،گراں فروشوں اور ناجائز ذخیرہ اندوزی کرنیوالوں سے حکومت آہنی ہاتھوں سے نمٹ رہی ہے۔