Live Updates

انجینئر امیر مقام نے سوات میں سیلاب کے دوران بہادری کا مظاہرہ کرنے والے نوجوانوں کو چیک پیش کئے

ہفتہ 16 اگست 2025 12:02

اسلام آباد (اُردو پوائنٹ اخبارتازہ ترین - اے پی پی۔ 16 اگست2025ء) وفاقی وزیر و صدر پاکستان مسلم لیگ(ن ) خیبرپختونخوا انجینئر امیر مقام نے گزشتہ دنوں سوات میں آنے والے سیلاب کے دوران امدادی کارروائیوں میں بہادری کا مظاہرہ کرنے والے کئی قیمتی جانوں کو اپنی مدد آپ کے تحت بچانے والے بے لوث رضاکاروں محمد ہلال اور عصمت علی کو وزیر اعظم کی جانب سے 10 ، 10 لاکھ روپے کے چیک پیش کئے۔

یہاں جاری بیان کے مطابق یہ چیک وزیرِاعظم محمد شہباز شریف کی جانب سے، محمد ہلال اور عصمت علی کو وفاقی وزیرانجینئر امیر مقام نے دئیے۔ یہ نقد انعام ان کی دلیرانہ اور بروقت امدادی کارروائیوں کے اعتراف میں دیا گیا ہے۔محمد ہلال اور عصمت علی نے قدرتی آفت (سانحہ سوات) کے دوران کئی جانیں بچائیں۔

(جاری ہے)

انجینئر امیر مقام نے دونوں رضاکاروں کی غیرمعمولی خدمات کو سراہتے ہوئے کہا کہ ان کے اقدامات انسانیت اور حب الوطنی کی حقیقی مثال ہیں۔

امیر مقام نے کہا کہ ان نوجوانوں نے اپنی جانوں کو خطرے میں ڈال کر دوسروں کی مدد کی،ان کی بہادری امید کی کرن ہے اور یہ یاددہانی ہے کہ ہماری قومی طاقت اتحاد اور ہمدردی میں مضمر ہے۔امیرمقام نے کہا کہ حکومت ایسے افراد کو تسلیم کرنے اور ان کی حوصلہ افزائی کرنے کے لیے پرعزم ہے جو بحران کے وقت قوم کی خدمت میں پیش پیش ہوتے ہیں،تمام رضاکاروں اور امدادی کارکنوں کا بھی شکریہ ادا کرتے ہیں جنہوں نے سیلاب کے دوران امدادی کارروائیوں میں اہم کردار ادا کیا۔رضاکاروں نے وزیر اعظم اور وفاقی وزیر کا شکریہ ادا کرتے ہوئے اس عزم کا اعادہ کیا کہ وہ آئندہ بھی ہر موقع پر قوم کی خدمت کرتے رہیں گے۔اس موقع پر سابق صوبائی وزیر محمد علی شاہ بھی موجود تھے۔