حکومت پنجاب آرگینگ فوڈ پراسیسنگ ، ویلیو ایڈیشن میں معاونت فراہم کرے، نجم مزاری

ہفتہ 16 اگست 2025 12:45

اسلام آباد (اُردو پوائنٹ اخبارتازہ ترین - اے پی پی۔ 16 اگست2025ء) آرگینک خوراک اور مصنوعات پر ریسرچ کرنے والے ادارے کے سربراہ نجم مزاری نے کہا ہے کہ روایتی برآمدات سے قومی معیشت کی ترقی کے اہداف کا حصول مشکل ہے، آرگینک خوراک اور مصنوعات کو عالمی سطح پر منوانے کیلئے لیبارٹریز، لیبلنگ اور پراسیسنگ یونٹس کے قیام کے لئے نجی شعبے کی معاونت کی جائے ،مصالحوں اور جڑی بوٹیوں کی عالمی سطح پر بڑی مانگ ہے اورپاکستان جدید پراسیسنگ اور پیکجنگ کے ذریعے بڑے پیمانے پر زرمبادلہ کا حصول ممکن بنا سکتا ہے۔

ان خیالات کا اظہار انہوں نے آرگینک خوراک کی ریسر چ سے وابستہ ماہرین کے وفد سے ملاقات میں گفتگو کرتے ہوئے کیا ۔وفدنے بتایا کہ پاکستان میں بہت سے لوگ انفرادی طور پر آرگینک خوراک کی برآمد کے لئے کاوشیں کر رہے ہیں تاہم حجم کم ہونے کی وجہ سے معاہدے طے نہیں ہو پاتے ۔

(جاری ہے)

نجم مزاری نے کہا کہ آرگینک خوراک ، مصنوعات اور جڑی بوٹیوں کی نہ صرف بیرون ممالک بلکہ پاکستان میں بھی مانگ بڑھ رہی ہے ۔

انہوں نے کہا کہ حکومت اسے برآمدی تناظر میں دیکھے اور اس کے لئے نجی شعبے کے ساتھ مل کر کام کیا جائے جس کے تحت ریسر چ ،معیاری پیداوار، عالمی معیار کے مطابق لیبارٹریز اورجدید لیبلنگ کو یقینی بنایا جا ئے۔انہوں نے کہا کہ پاکستان میں جڑی بوٹیوں اور آرگینک زرعی اجناس کی برآمدات کے وسیع مواقع موجود ہیں تاہم ان مصنوعات کی عالمی سطح پر قبولیت کے لیے معیاری پیکنگ، درست لیبلنگ اور شفاف ٹیسٹنگ لازمی ہے اس مقصد کے لیے جدید لیبارٹریز کے قیام اور سرٹیفکیشن کے نظام کی بنیاد قائم کرنا ہو گی جو حکومتی سر پرستی کے بغیر ممکن نہیں ۔

نجم مزاری نے کہا کہ حکومت آرگینک فارمنگ کے فروغ، کسانوں کی تربیت اور عالمی معیار کے مطابق پراسیسنگ یونٹس کے قیام کے لئے منصوبے شروع کرے۔ نجم مزاری نے اس امید کا اظہار کیا کہ پنجاب حکومت آرگینک فوڈ پراسیسنگ اور جڑی بوٹیوں کی ویلیو ایڈیشن کے منصوبے شروع کرنے میں نجی شعبے کی معاونت کرے گی۔