Live Updates

ریسکیو 1122 کی جانب سے مون سون بارشوں کے دوران شہریوں کو احتیاطی تدابیراپنانے کی ہدایت

ہفتہ 16 اگست 2025 17:53

فیصل آباد (اُردو پوائنٹ اخبارتازہ ترین - اے پی پی۔ 16 اگست2025ء) ریسکیو 1122 فیصل آبادکی جانب سے مون سون بارشوں کے دوران شہریوں کی حفاظت کے لیے احتیاطی تدابیر اپنانے کی ہدایات جاری کردی گئی ہیں۔ ڈسرکٹ ایمرجنسی آفیسرفیصل آباد انجینئر احتشام واہلہ نے مون سون سیزن کے دوران شہریوں کی جان و مال کے تحفظ اور کسی بھی ممکنہ ہنگامی صورتحال سے نمٹنے کے لیے جامع احتیاطی تدابیراپنانے کی ہدایت کی ہے اور اپنے پیغام میں انہوں نے کہا ہے کہ مون سون بارشیں جہاں خوشگوار موسم کا پیغام لاتی ہیں وہیں یہ بعض اوقات خطرناک ہنگامی حالات کا سبب بھی بن سکتی ہیں، ریسکیو 1122 فیصل آبادپوری طرح الرٹ ہے لیکن شہریوں کا محتاط اور ذمہ دار رویہ ہی سب سے مؤثر دفاع ثابت ہو سکتا ہے۔

ڈسٹرکٹ ایمرجنسی آفیسر انجینئر احتشام واہلہ نے شہریوں سے کہاکہ برقی تاروں اور کھمبوں کوگیلی حالت میں ہرگزنہ چھوئیں، ٹوٹی ہوئی یا ننگی تاروں سے دُوررہیں اور جانوروں کو بھی اُن کے قریب نہ جانے دیں، گرج چمک کے دوران درختوں کے نیچے پناہ نہ لیں کیونکہ آسمانی بجلی گرنے کا خطرہ بڑھ جاتا ہے۔

(جاری ہے)

انہوں نے کہا کہ برقی آلات کو بارش کے دوران استعمال کرتے وقت احتیاط برتیں، بہتے یا کھڑے پانی میں چلنے یا گاڑی چلانے سے گریز کریں، بچوں کو بارش میں نہانے سے روکیں تاکہ وہ کسی حادثہ کا شکار نہ ہوں، سڑکوں پر پانی کے نیچے چھپی رکاوٹیں اور گڑھے حادثے کا باعث بن سکتے ہیں لہٰذا محتاط رہیں، بارش میں گاڑی آہستہ چلائیں اور چھوٹے گیئر کا استعمال کریں، گاڑی کی ہیڈ لائٹس اورفوگ لائٹس آن رکھیں، اچانک بریک یا تیزرفتاری سے مکمل اجتناب کریں۔

انہوں نے کہا کہ مون سون کے دوران ندی نالوں اور دریاؤں کے کنارے جانا خطرناک ہو سکتا ہے، پانی کے تیز بہاؤ اور ممکنہ طغیانی سے ہوشیار رہیں، کمزور یا پرانی چھتوں اور دیواروں کے نیچے بیٹھنا یا کھڑا ہونا خطرناک ہو سکتا ہے، اسکے علاوہ تیز ہواؤں کے دوران درختوں، کھمبوں یا بل بورڈز کے نیچے پناہ نہ لیں۔ڈسرکٹ ایمرجنسی آفیسر نے مزید کہاکہ ریسکیو 1122 کی تمام ٹیمیں ہنگامی صورتحال سے نمٹنے کے لیے مکمل تیار ہیں لیکن شہریوں کی آگاہی اور تعاون نہایت ضروری ہے، ہم سب کی مشترکہ کوششوں سے ہی ایک محفوظ معاشرہ تشکیل پا سکتا ہے، شہریوں سے گزارش ہے کہ کسی بھی ہنگامی صورتحال میں فوراً ریسکیو 1122 پر کال کریں، ریسکیو 1122 ہر وقت آپ کی خدمت کے لیے ہمہ وقت موجود ہے۔