مطاہر اکیڈمی جشن آزادی بیڈمنٹن ٹورنامنٹ مینز ڈبلز کا ٹائٹل خزیمہ اور فیض نے جبکہ لیڈیز ڈبلز کا کنزہ اور بزل نے جیت لیا

ہفتہ 16 اگست 2025 23:40

اسلام آباد (اُردو پوائنٹ اخبارتازہ ترین - اے پی پی۔ 16 اگست2025ء) مطاہر اکیڈمی جشن آزادی بیڈمنٹن ٹورنامنٹ میں مینز ڈبلز کا ٹائٹل خزیمہ اور فیض نے جبکہ لیڈیز ڈبلز کا ٹائٹل کنزہ اور بزل نے جیت لیا۔ ٹورنامنٹ کی اختتامی تقریب کے مہمانان خصوصی ڈسٹرکٹ سپورٹس آفیسر راولپنڈی،شمس توحید عباسی، نیشنل بیڈمنٹن چیمپئن محمد علی لاروش، واجد مختار عباسی اورسید کامران کامی نے کامیابی حاصل کرنے والے کھلاڑیوں میں انعامات تقسیم کئے۔

مطاہر بیڈمنٹن اکیڈمی راولپنڈی کے ہیڈ کوچ اور سپورٹس ہائوس رحمان آباد راولپنڈی کے سربراہ مطاہر سہیل نے ٹورنامنٹ کی رپورٹ پیش کی۔ ٹورنامنٹ میں راولپنڈی اور اسلام آباد سے سو سے زائد مرد اور خواتین کھلاڑیوں نے حصہ لیا اور ٹورنامنٹ میں پانچ کیٹگریز کے مقابلے رکھے گئے تھے جن میں مینز ڈبلز، لیڈیز ڈبلز، مکسڈ ڈبلز، ویٹرن اور انڈر 13 کے مقابلے شامل تھے۔

(جاری ہے)

تفصیلات کے مطابق مطاہر بیڈمنٹن اکیڈمی راولپنڈی کے زیر اہتمام اور ڈسٹرکٹ سپورٹس ڈیپارٹمنٹ کے تعاون سے شہباز شریف سپورٹس کمپلیکس، راولپنڈی میں کھیلے گئے مطاہر اکیڈمی جشن آزادی بیڈمنٹن ٹورنامنٹ میں مینز ڈبلز کے مقابلوں میں خزیمہ اور فیض نے کامیابی حاصل کی جبکہ توفید اور عمر گلو نے دوسری پوزیشن حاصل کی۔ لیڈیز ڈبلز کے مقابلوں میں کنزہ اور بزل نے کامیابی حاصل کی جبکہ عائشہ اور ایلا نے دوسری پوزیشن حاصل کی۔

اسی طرح مکسڈ ڈبلز کے مقابلوں میں رضا اور ایلا نے پہلی جبکہ سہیل اور میشال نےدوسری پوزیشن حاصل کی۔ راجہ ممتاز نے ویٹرن کا ٹائٹل اپنے نام کیا اور انڈر 13 کا ٹائٹل یاسین طارق نے جیت لیا۔ ٹورنامنٹ کے اختتام پر پاکستان زندھ آباد کے نعروں سے ہال گونج اٹھا اور ملک پاکستان کی سلامتی اور خوشحالی کے لئے بھی دعا کی گئی۔