خواتین اورمرد باکسرز نے عالمی رِنگ میں پاکستان کا پرچم بلند کردیا

پیر 1 ستمبر 2025 18:07

اسلام آباد (اُردو پوائنٹ اخبارتازہ ترین - اے پی پی۔ 01 ستمبر2025ء) خواتین اور مرد باکسرز نے عالمی رِنگ میں پاکستان کا پرچم بلند کر دیا، پاکستانی خواتین باکسرز نے چین میں جاری تھرڈ بیلٹ اینڈ روڈ انٹرنیشنل باکسنگ گالا میں شاندار کارکردگی کا مظاہرہ کیا ہے۔ پاک آرمی کی عائشہ ممتاز ویمنز انڈر 18، 48 کلوگرام کیٹگری کے فائنل میں پہنچ گئیں ۔ عائشہ ممتاز نے ویمنز انڈر 18کے فائنل میں پہنچ کر پاکستان کیلئے سلور میڈل یقینی بنا دیا ہے ۔

چین میں جاری تھرڈ بیلٹ اینڈ روڈ انٹرنیشنل باکسنگ گالا میں دنیا کے 26 ممالک کی34 ٹیمیں شریک ہیں۔ تھرڈ بیلٹ اینڈ روڈ انٹرنیشنل باکسنگ گالا میں پاک آرمی کی ملائیکہ زاہد اورماریا بھی سیمی فائنلسٹ میں شامل ہیں۔ چین میں جاری تھرڈ بیلٹ اینڈ روڈ انٹرنیشنل باکسنگ گالا میں پاکستانی مرد باکسرز نے بھی شاندار کارکردگی کا مظاہرہ کیا۔

(جاری ہے)

پاک آرمی کے قدرت اللہ سیمی فائنلسٹ،حذیفہ راحیل (پنجاب) اور ضمیر علی (کے پی) کوارٹر فائنلسٹ ہیں ۔

پاکستان باکسنگ فیڈریشن کی چیئرپرسن بیگم عشرت اشرف نے کہا کہ پاکستانی کھلاڑیوں نے نہ صرف جیت حاصل کی بلکہ جرأت، ڈسپلن اور عزم سے دنیا بھر کو متاثر کیا۔ صدر پاکستان باکسنگ فیڈریشن لیفٹیننٹ کرنل (ر) محمد ناصر اعجاز نے کہا کہ عالمی سطح پر خواتین کھلاڑیوں کی جیت پاکستان باکسنگ کے لئے ایک تاریخی لمحہ ہے، قوم کی بیٹیوں نے بے مثال ہمت سے دنیا کو پیغام دیاکہ پاکستان عالمی باکسنگ میں ناقابلِ نظرانداز قوت ہے۔

انہوں نے کہا کہ ہم نے کھلاڑیوں کو سخت محنت، جدید تربیت اور بہترین سہولتیں فراہم کیں اور یہ کامیابیاں آنے والے کل کی بنیاد ہیں، کھلاڑیوں کو ہر ممکن سہولت فراہم کرتے رہیں گے۔ انہوں نے کہا کہ شاندار نتائج قومی ٹریننگ کیمپ کی باقاعدہ تیاریوں اور کوچز کی انتھک محنت کا ثمر ہیں، عالمی سطح پر باکسنگ رِنگ میں شاندار کارکردگی سے پاکستانی خواتین باکسرز تاریخ رقم کر رہی ہیں۔