دھونی کو پھر ورلڈکپ کیلئے بھارت کی مینٹورشپ کی پیشکش، پاکستان کیلیے خوش قسمتی کی علامت بننے کا امکان

سابق کپتان اور لیجنڈ کھلاڑی بھارتی ٹیم کے ساتھ یو اے ای میں 2021 کے ٹی ٹونٹی ورلڈکپ میں بطور مینٹور کام کرچکے ہیں

ذیشان مہتاب پیر 1 ستمبر 2025 11:30

دھونی کو پھر ورلڈکپ کیلئے بھارت کی مینٹورشپ کی پیشکش، پاکستان کیلیے ..

نئی دہلی (اردو پوائنٹ تازہ ترین اخبار ۔ یکم ستمبر 2025ء ) بھارت کے سابق کپتان مہندر سنگھ دھونی کو ٹی ٹونٹی ورلڈکپ 2026ء کیلیے ایک بار پھر انڈین کرکٹ ٹیم کی مینٹورشپ کی پیشکش کی گئی ہے۔

آئندہ سال شیڈول ورلڈکپ کیلیے بھارتی کرکٹ بورڈ ایک بار پھر سے مہندر سنگھ دھونی کو مینٹور بنانے کی خواہشمند ہے، تاہم کیا بھارت کی چال اس بار بھی الٹی ہونے جارہی ہے اور پاکستان ایک بار 2021ء کی طرح بھارت کو شکست دیگا، یہ سوال اپنی جگہ اہمیت کا حامل ہے۔

بھارتی ذرائع ابلاغ کی رپورٹ کے مطابق بورڈ آف کرکٹ کنٹرول ان انڈیا نے ایک بار پھر ایم ایس دھونی سے بھارتی ٹیم کے مینٹور بننے کے لیے رابطہ کیا ہے۔

اس سے قبل سابق کپتان اور لیجنڈ کھلاڑی بھارتی ٹیم کے ساتھ یو اے ای میں 2021ء کے ٹی ٹونٹی ورلڈکپ میں بطور مینٹور کام کرچکے ہیں، تاہم اس ایونٹ میں بھارتی ٹیم کو پاکستان نے بدترین شکست دی تھی۔

(جاری ہے)

آئی سی سی ورلڈکپ کی تاریخ میں پہلی مرتبہ پاکستان نے روایتی حریف کو شکست دی تھی بلکہ بھارت کو دس وکٹوں سے ہرایا تھا جس میں بابر اعظم اور محمد رضوان نے نصف سنچریاں سکور کی تھیں۔

بلیو شرٹس کی پرفارمنس اتنی خراب تھی کہ وہ اس ایونٹ کے ناک آؤٹ مرحلے میں بھی جگہ بنانے میں ناکام رہی تھی۔

اب بھارتی ٹیم ٹی ٹونٹی ورلڈکپ 2026ء میں اپنے اعزاز کا دفاع کرے گی، اگر ایک بار پھر سے دھونی 2021ء کی طرح بھارتی ٹیم کے مینٹور مقرر ہوتے ہیں تو شائقین کیلیے کافی دلچسپی کا حامل ہوگا۔

پاکستان کرکٹ ٹیم کے مداح یقیناً اس بات کے خواہشمند ہونگے کہ پاکستان ٹیم ایک بار پھر سے 2021ء کی تاریخ دہرائے تاہم یہ فیصلہ میچ والے دن ہوگا، جس ٹیم کی پرفارمنس بہترین ہوگی جیت اسی کا مقدر ٹھہرے گی۔