امریکی ٹیرف سے بھر پور فائدہ اٹھانے کے لیے برآمدات کو بڑھانے کی ضرورت ہے، افتخار علی ملک

اتوار 17 اگست 2025 13:20

لاہور (اُردو پوائنٹ اخبارتازہ ترین - اے پی پی۔ 17 اگست2025ء) یو ایس پاکستان بزنس کونسل کے بانی چیئرمین افتخار علی ملک نے کہا ہے کہ امریکی صدر ڈونلڈ ٹرمپ کی جانب سے نافذ 19 فیصد ٹیرف سے بھر پور فائدہ اٹھانے کے لیے برآمدات کو بڑھانے کی ضرورت ہے۔ اتوار کو یہاں ایک بیان میں انہوں نے کہا کہ ٹیرف نے اگرچہ عالمی تجارت کے لیے نئے چیلنجز کھڑے کیے ہیں تاہم اس نے پاکستان کے لیے امریکی مارکیٹ میں قدم جمانے کے مواقع فراہم کیے ہیں، ٹیکسٹائل، چمڑے کے سامان، آلات جراحی، کھیلوں کے سامان اور زرعی مصنوعات کی مارکیٹنگ، تجارتی میلوں میں شرکت اور کاروباری روابط کو فروغ دیا جائے تو زیادہ سے زیادہ مارکیٹ شیئر حاصل کیا جا سکتا ہے۔

افتخار علی ملک نے کہا کہ بعض حریف ممالک کو زیادہ ٹیرف کا سامنا ہے اس لیے یہ جدت، ویلیو ایڈیشن اور جرات مندانہ اقدامات کا وقت ہے۔

(جاری ہے)

پاکستان کے برآمد کنندگان کو اس موقع سے فائدہ اٹھاتے ہوئے کاروباری مذاکرات، طویل مدتی سپلائی کے معاہدوں اور امریکی خریداروں کا اعتماد حاصل کر کے برآمدات کو فروغ دینا چاہیے۔ انہوں نے امریکی مارکیٹ کو ٹارگٹ کرنے والے برآمد کنندگان کے لیے خصوصی سہولت کاری ڈیسک قائم کرنے کی بھی سفارش کی۔ انہوں نے کہا کہ یو ایس پاکستان بزنس کونسل دونوں ممالک کے نجی شعبوں کے درمیان پل کے طور پر کام کرنے اور تجارتی تعلقات کے فروغ کے لیے پر عزم ہے۔