چیئرمین این ڈی ایم اے نے مون سون کے مزید 2 خطرناک اسپیل سے خبردار کردیا

پیر 18 اگست 2025 17:20

اسلام آباد (اُردو پوائنٹ اخبارتازہ ترین - این این آئی۔ 18 اگست2025ء)چیئرمین نیشنل ڈیزاسٹر مینجمنٹ اتھارٹی (این ڈی ایم ای) لیفٹیننٹ جنرل انعام حیدر نے خبردار کیا ہے کہ مون سون کے مزید 2 اسپیل آ رہے ہیں جو اس سے بھی زیادہ سخت ہیں۔وفاقی وزراء کے ہمراہ پریس کانفرنس کرتے ہوئے چیئرمین این ڈی ایم اے لیفٹیننٹ جنرل انعام حیدر کا کہنا تھا پاکستان مون سون کے ساتویں اسپیل سے گزر رہا ہے، موسمیاتی تبدیلی کی وجہ سے گلیشیئرز تیزی سے پگھل رہے ہیں، شمالی علاقوں سے جب گلیشیئرز سے پانی آئے گا تو نشیبی علاقوں میں تباہی ہو گی۔

انہوںنے کہاکہ دو چار دنوں میں خیبر پختونخوا میں کلاؤڈ برسٹ ہوئے ہیں، گلیشئرز پگھلنے اور کلاؤڈ برسٹ ہونے کی وجہ سے نقصان زیادہ ہوا، حالیہ مون سون سیزن میں اب تک 670 افراد جاں بحق اور ایک ہزار کے قریب افراد زخمی ہوئے ہیں، 80 سے نوے افراد لاپتا ہیں، جن کی تلاش جاری ہے۔

(جاری ہے)

چیئرمین این ڈی ایم اے نے کہاکہ کلاؤڈ برسٹ اور علاقائی بارشوں کی مزید پیشگوئی ہے، دو مون سون اسپیل مزید آرہے ہیں جو سخت ہیں، ستمبر تک صورتحال معمول پر آ جائے گی۔

انہوںنے کہاکہ سب سے پہلے ترجیح لوگوں کو ریلیف کیمپ میں پہنچانے پر ہے، مختلف علاقوں میں ریلیف کیمپ قائم کردیے گئے ہیں، متاثرہ علاقوں میں میڈیکل سہولتیں بھی دی جا رہی ہیں، سیلاب متاثرین کو پبلک عمارتوں میں رکھا گیا ہے۔چیئرمین این ڈی ایم اے نے بتایا کہ خیبر پختونخوا کے متاثرہ علاقوں میں راشن اور دیگر سامان بھیجا جا رہا ہے، متاثرین تک یہ امدادی سامان پہنچایا جا رہا ہے۔انہوں نے بتایا کہ گلگت کا سروے مکمل کر لیا گیا ہے، لیکن مون سون سیزن ختم ہونے کے بعد ہی نقصانات کی اصل صورتحال سامنیآسکے گی، تمام ڈیٹا متعلقہ حکام کے ساتھ شیئر کیا جا رہا ہے۔