پنجاب حکومت کا لاہور میں اگلے سال ٹرام سروس شروع کرنے کا اعلان

پیر 18 اگست 2025 21:45

لاہور (اُردو پوائنٹ اخبارتازہ ترین - آن لائن۔ 18 اگست2025ء) پنجاب حکومت نے صوبائی دارالحکومت میں ٹرانسپورٹ کے جدید منصوبے کے طور پر ٹرام سروس شروع کرنے کا اعلان کر دیا ہے۔ وزیر ٹرانسپورٹ پنجاب بلال اکبر خان کے مطابق ٹرام کا کامیاب ٹیسٹ مکمل کر لیا گیا ہے اور یہ سروس فروری 2026ء سے ٹھوکر سے ہربنس پورہ تک چلائی جائے گی۔ ٹرام میں 270 نشستوں کی گنجائش ہوگی جبکہ منصوبے پر 30 لاکھ ڈالر لاگت آئے گی۔

(جاری ہے)

صوبائی وزیر نے بتایا کہ منصوبے کے لیے پنجاب نیسپاک اور پی ایم اے افسران نے چین کا دورہ بھی کیا۔ اس کے ساتھ ساتھ فیصل آباد اور گوجرانوالہ میں بھی میٹرو ٹرین سروس شروع کرنے کا فیصلہ کیا گیا ہے۔ فیصل آباد میٹرو ٹرین یومیہ 3 لاکھ مسافروں کو سہولت فراہم کرے گی جس پر 110 ملین ڈالر لاگت آئے گی، جبکہ گوجرانوالہ میٹرو منصوبے پر 50 ملین ڈالر لاگت آئے گی اور روزانہ 1 لاکھ 40 ہزار افراد سفر کر سکیں گے۔بلال اکبر خان کا کہنا تھا کہ لاہور میں گاڑیوں اور موٹر سائیکلوں سے بڑھتی ماحولیاتی آلودگی پر قابو پانے کے لیے ٹرام اور میٹرو ٹرین منصوبے انتہائی اہم کردار ادا کریں گے۔