بھابھی کے اغواء کی غلط معلومات پر پٹیشن دائر کرنے والی درخواست گزار نند کو 50 ہزار روپے جرمانہ عائد

پیر 18 اگست 2025 22:55

اسلام آباد (اُردو پوائنٹ اخبارتازہ ترین - اے پی پی۔ 18 اگست2025ء) اسلام آباد ہائی کورٹ نے بھابھی کے اغواء کی غلط معلومات پر پٹیشن دائر کرنے والی درخواست گزار نند کو 50 ہزار روپے جرمانہ عائد کر دیا۔ جس خاتون کے مبینہ اغوا ءپر پٹیشن دائر کی گئی اس نے عدالت میں پیش ہو کر بیان دیا کہ وہ اپنی مرضی سے والدین سے ملنے چنیوٹ گئی تھی۔اسلام آباد ہائی کورٹ کے جسٹس محمد اعظم خان نے خاتون شہری ایمن جویریہ کی درخواست پرسماعت کی جس نےاپنی بھابھی عزہ بی بی کے مبینہ اغوا ءپر عدالت سے رجوع کیا تھا ۔

(جاری ہے)

وفاقی پولیس کے ڈی ایس پی لیگل ساجد چیمہ اور دیگر عدالت میں پیش ہوئے۔ انہوں نے لاپتہ خاتون عزہ بی بی کو عدالت میں پیش کیا اور اس متعلق رپورٹ بھی جمع کرائی۔ رپورٹ میں بتایا گیا کہ درخواست گزار نے ایک ہی مقدمہ میں اسلام آباد اور لاہور ہائیکورٹ سے رجوع کر رکھا ہے۔ عزہ بی بی نے عدالت میں بیان دیا کہ وہ والدین سے ملنے چنیوٹ گئی تھی اور وہ ان کے ساتھ ہی رہنا چاہتی ہے۔ اسلام آباد ہائی کورٹ نے غلط معلومات فراہمی پردرخواست گزار کو 50 ہزارروپے کا جرمانہ عائد کرتے ہوئے پٹیشن خارج کر دی ۔ ایمن جویریہ نامی خاتون نے اپنی نند عزہ بی بی کی بازیابی کیلئے درخواست کی تھی۔