سپیکر و ڈپٹی سپیکر قومی اسمبلی کا سیلابی ریلوں سے قیمتی جانوں کے ضیاع پر گہرے دکھ اور افسوس کا اظہار

منگل 19 اگست 2025 18:52

اسلام آباد (اُردو پوائنٹ اخبارتازہ ترین - این این آئی۔ 19 اگست2025ء)سپیکر سردار ایاز صادق اور ڈپٹی سپیکر سید غلام مصطفی شاہ نے گلگت بلتستان، خیبرپختونخوا اور آزاد کشمیر میں سیلابی ریلوں سے قیمتی جانوں کے ضیاع پر گہرے دکھ اور افسوس کا اظہار کرتے ہوئے سیلاب سے متاثرہ خاندانوں سے دلی ہمدردی اور یکجہتی کا اظہار کیا۔ سپیکر سردار ایاز صادق اور ڈپٹی سپیکر سید غلام مصطفی شاہ نے اپنی ایک ایک ماہ کی تنخواہ سیلاب متاثرین کو دینے کا فیصلہ کیا۔

منگل کو قومی اسمبلی سیکرٹریٹ کے مطابق سپیکر نے کہا کہ مشکل وقت میں سیلاب متاثرین کو تنہا نہیں چھوڑیں گے،سیلاب متاثرین کی بحالی کیلئے پوری قوم کو آگے بڑھنا ہوگا،متاثرین کی امداد اور بحالی قومی فریضہ ہے،پاکستانی قوم ہمیشہ مشکل وقت میں بھائی چارے اور جذبہ ایثار کی مثال قائم کرتی ہے،سیلاب متاثرین ہماری اجتماعی توجہ اور عملی مدد کے منتظر ہیں۔

(جاری ہے)

ہر پاکستانی کا فرض ہے کہ وہ بڑھ چڑھ کا سیلاب متاثرین کی بحالی اور امداد کیلئے آگے بڑھے، ہمارے بھائی اور بہنیں اس وقت مشکل اور کرب سے گزر رہے ہیں، جن کے پیاروں کی لاشیں ابھی تک نہیں ملی ان کے دکھوں کا مداوا مشکل ہے، بونیر میں خاندانوں کے خاندان اجڑ گئے ہیں، میری دلی ہمدردیاں انکے اہلخانہ کے ساتھ ہیں۔سپیکر سردار ایاز صادق نے سیلابی ریلے میں جاں بحق ہونے والے افراد کے درجات کی بلندی کیلئے دعا بھی کی۔