ریلوے میں رائٹ مین فار دی رائٹ جاب کے اصول پر عمل ہوگا‘ حنیف عباسی

جنرل اسٹور کی مکمل انسپکشن کرنے ،تھرڈ پارٹی تجزیہ رپورٹ دس روز میں وزارت کو بھیجنے کی ہدایت

منگل 19 اگست 2025 19:08

ریلوے میں رائٹ مین فار دی رائٹ جاب کے اصول پر عمل ہوگا‘ حنیف عباسی

لاہور(اُردو پوائنٹ اخبارتازہ ترین - این این آئی۔ 19 اگست2025ء)وفاقی وزیر ریلوے محمد حنیف عباسی نے کہا ہے کہ ریلوے میں رائٹ مین فار دی رائٹ جاب کے اصول پر عمل ہوگا،صرف وہی افسر اہم پوسٹنگ اور ترقی کا حقدار ہوگا جو کارکردگی دکھائے گا، کارکردگی نہ دکھانے والے افسران اپنے نتائج کے خود ذمہ دار ہوں گے۔وفاقی وزیر ریلوے محمد حنیف عباسی کی زیر صدارت اجلاس ہوا جس میں مکینیکل ڈیپارٹمنٹ کو کارکردگی میں بہتری کے لیے اہم ہدایات اوراہداف سونپے گئے جبکہ ریلوے آپریشن کو مزید موثر اور فعال بنانے کے لیے متعدد فیصلے کیے گئے۔

وفاقی وزیر نے ایڈیشنل جنرل مینیجر مکینیکل کو جنرل اسٹور کی مکمل انسپکشن کرنے اور اس سلسلے میں تھرڈ پارٹی تجزیہ رپورٹ دس روز میں وزارت کو بھیجنے کی ہدایت دی۔

(جاری ہے)

اجلاس میں فیصلہ کیا گیا کہ سیفٹی سے متعلقہ آئٹمز کی فوری فراہمی کے لیے ایک ہفتے میں پلان تیار کیا جائے۔وزیر ریلوے حنیف عباسی نے واضح کیا کہ 60 دن کے اندر ریل کاروں کی ریفربشمنٹ مکمل کر کے مسافروں کو بہتر سہولیات فراہم کی جائیں۔

اسی طرح کوئلہ لے جانے والی 600 ویگنوں کی موجودہ ان فٹ حالت پر تشویش کا اظہار کرتے ہوئے ہدایت کی گئی کہ انہیں دو ماہ کے اندر مکمل طور پر فٹ کر کے فریٹ سسٹم میں شامل کیا جائے تاکہ کراچی سے ریونیو میں خاطر خواہ اضافہ ہو سکے۔اجلاس میں نارووال سیکشن کی اپ گریڈیشن کا فیصلہ کیا گیا جس کے بعد اس سیکشن پر چلنے والی گاڑیوں میں سہولیات میں بہتری لائی جائے گی۔

مزید برآں وزیر ریلوے نے چینی کوچز میں نئے ائیر کنڈیشننگ یونٹس مقررہ مدت سے پہلے نصب کرنے اور اسلام آباد کیرج فیکٹری کو پروڈکشن اسپیڈ بڑھانے کی ہدایت دی تاکہ جلد از جلد نئی کوچز سسٹم میں شامل کی جا سکیں۔وزیر ریلوے حنیف عباسی نے پاور پلانٹس کی آئوٹ سورسنگ کے امکانات پر ورکنگ کرنے کی بھی ہدایت کی جبکہ حادثات کا شکار انجنوں کی مرمت کے لیے روڈ میپ پیش کرنے کا حکم دیا۔

اس حوالے سے چیف ایگزیکٹو آفیسر کی نگرانی میں اے جی ایم مکینیکل ان تمام ہدایات پر عمل درآمد کرائیں گے۔وفاقی وزیر ریلوے نے شعبہ ٹریفک اینڈ کمرشل کے افسران سے ون آن ون ملاقاتیں بھی کیں اور واضح کیا کہ ریلوے میں رائٹ مین فار دی رائٹ جاب کے اصول پر عمل ہوگا۔صرف وہی افسر اہم پوسٹنگ اور ترقی کا حقدار ہوگا جو کارکردگی دکھائے گا۔ کارکردگی نہ دکھانے والے افسران اپنے نتائج کے خود ذمہ دار ہوں گے۔