پاکستان اور انڈیا میں سیلاب کی تباہ کاریوں پر یو این چیف کا اظہار افسوس

اسلام آباد (اُردو پوائنٹ ۔ UN اردو۔ 19 اگست 2025ء) اقوام متحدہ کے سیکرٹری جنرل انتونیو گوتیرش نے پاکستان اور انڈیا میں سیلاب سے جانی نقصان پر افسوس کا اظہار کیا ہے جہاں حالیہ دنوں شدید بارشوں کے نتیجے میں اچانک آنے والے سیلاب اور پہاڑی تودے گرنے سے سیکڑوں افراد ہلاک، زخمی اور لاپتہ ہو چکے ہیں۔

سیکرٹری جنرل نے متاثرہ خاندانوں سے ہمدردی کا اظہار کرتے ہوئے کہا ہے کہ اقوام متحدہ اس آفت کی زد میں آنے والوں کے ساتھ اظہار یکجہتی کرتا ہے۔

دونوں ممالک میں اقوام متحدہ کی ٹیمیں متاثرہ علاقوں میں تحفظ کی خدمات اور امداد کی فراہمی کے لیے تیار ہیں تاہم فی الوقت ان کی جانب سے مدد کی درخواستیں موصول نہیں ہوئیں۔

(جاری ہے)

اطلاعات کے مطابق، پاکستان کے صوبہ خیبرپختونخواہ میں یہ آفت حالیہ دنوں کم از کم 333 جانیں لے چکی ہے جبکہ سیکڑوں لوگ زخمی ہو گئے ہیں۔ حکام کے مطابق، شمال مغربی شہر بونیر سیلاب سے بری طرح متاثر ہوا ہے جہاں 200 سے زیادہ اموات کی اطلاع ہے۔

بچوں کا بھاری نقصان

اقوام متحدہ کے ادارہ برائے اطفال (یونیسف) نے پاکستان میں سیلاب سے جانی و مالی نقصان پر افسوس کا اظہار کرتے ہوئے بتایا ہے کہ 15 اگست کے بعد صوبہ خیبرپختونخوا اور شمالی علاقوں میں سیلاب اور پہاڑی تودے گرنے سے ہلاک ہونے والوں میں کم از کم 21 بچے بھی شامل ہیں۔

ادارے نے گلگت بلتستان سمیت متاثرہ علاقوں میں ضروری ادویات بھیجوائی ہیں اور امدادی کارروائیوں کے لیے حکومت کو ہرممکن مدد کی فراہمی کے لیے تیار ہے۔

یونیسف کی جانب سے جاری کردہ بیان میں کہا گیا ہے کہ سیلاب سے بچوں کو بہت زیادہ نقصان ہوا ہے جنہیں نقل مکانی، تعلیم میں خلل اور صاف پانی تک رسائی میں مشکلات جیسے مسائل کا سامنا ہے۔

سکولوں کی تباہی

ادارے کا کہنا ہے کہ اگرچہ موسمیاتی تبدیلی میں بچوں کا کردار نہ ہونے کے برابر ہے لیکن وہ اس کی تباہ کاریوں سے بری طرح متاثر ہو رہے ہیں۔

خیبرپختونخواہ میں سیلاب سے متعدد سکولوں کو بھی نقصان پہنچا ہے جن میں بعض مکمل طور پر تباہ ہو گئے ہیں۔ بہت سے سکولوں کو عارضی پناہ گاہوں میں تبدیل کر دیا گیا ہے جس سے بچوں کے لیے تعلیم اور محفوظ جگہوں تک رسائی مزید محدود ہو گئی ہے۔

رواں سال پاکستان میں مون سون کی شدت گزشتہ سال کے مقابلے میں 50 تا 60 فیصد زیادہ رہی۔ 26 جون کے بعد سیلاب اور پہاڑی تودے گرنے کے واقعات میں 171 افراد ہلاک اور 256 زخمی ہو چکے ہیں۔

یونیسف نے کہا ہے کہ ادارہ اپنے شراکت داروں کے تعاون سے ملک میں بچوں سمیت متاثرہ لوگوں کو بحالی اور ایسے مستقبل کی تعمیر میں مدد دینے کے لیے تیار ہے جس میں وہ موسمیاتی دھچکوں کو سہنے کے قابل ہوں۔