ایس ای سی پی نے کیپیٹل مارکیٹ ڈویلپمنٹ فنڈ کو فعال کر دیا

بدھ 20 اگست 2025 23:06

اسلام آباد (اُردو پوائنٹ اخبارتازہ ترین - این این آئی۔ 20 اگست2025ء)سیکورٹیز اینڈ ایکسچینج کمیشن آف پاکستان نے کیپیٹل مارکیٹ ڈیولپمنٹ فنڈ (سی ایم ڈی ایف) کو فعال کرنے کی منظوری دے دی اور اس کے ضوابط کار (ٹی او آرز) بھی منظور کر لیے، تاکہ کیپیٹل مارکیٹ کی فوری ترقیاتی ضروریات کو بین الاقوامی بہترین طریقہ کار کے مطابق پورا کیا جا سکے۔کیپیٹل مارکیٹ ڈیولپمنٹ فنڈ (سی ایم ڈی ایف) کا قیام مالیاتی شعور اور عوامی آگاہی میں اضافے کے بنیادی مقصد کے ساتھ کیا گیا ہے، اس کے تحت چھوٹے سرمایہ کاروں کو کیپیٹل مارکیٹ کے مواقعوں کے بارے میں آگاہی فراہم کی جائے گی، جس سے مالی شمولیت کو فروغ ملے گا اور معیشت کی قرض کی ضروریات پوری کرنے کے لیے متبادل فنڈنگ کا ذریعہ میسر آئے گا۔

مزید برآں، سی ایم ڈی ایف کے ثانوی مقاصد میں مارکیٹ کے شرکائ کی صلاحیتوں میں اضافہ اور ایسے نئے طبقات و علاقوں تک رسائی شامل ہے جو اب تک نظر انداز رہے ہیں۔

(جاری ہے)

کیپیٹل مارکیٹ ڈیولپمنٹ فنڈ (سی ایم ڈی ایف) کے تحت مارکیٹ کے اہم ادارے مالی تعاون فراہم کریں گے، پاکستان اسٹاک ایکسچینج (پی ایس ایکس)، نیشنل کلیئرنگ کمپنی آف پاکستان لمیٹڈ، سینٹرل ڈپازٹری کمپنی (سی ڈی سی) اور پاکستان مرکنٹائل ایکسچینج اس اقدام کا حصہ ہیں۔

یہ ادارے ابتدائی طور پر 30 ملین روپے بطور (سیڈ) کیپیٹل فراہم کریں گے، اس کے ساتھ ہی اپنی سالانہ آمدنی کا ایک فیصد بھی کیپیٹل مارکیٹ کی ترقیاتی سرگرمیوں کے لیے مختص کریں گے، یہ شراکت کیپیٹل مارکیٹ کی مضبوطی اور اس کی پائیدار ترقی کے لیے ایک اہم قدم ہے۔فنڈ کا انتظام انسٹی ٹیوٹ آف فنانشل مارکیٹس آف پاکستان کرے گا، جس کی نگرانی ایک اسٹیئرنگ کمیٹی کرے گی، اس کمیٹی میں سی ڈی سی، این سی سی پی آئی، پی ایس ایکس، آئی ایف ایم پی اور پی ایم ای ایکس کے نمائندگان شامل ہوں گے۔

اسٹیئرنگ کمیٹی فنڈ کی تمام سرگرمیوں کے لیے گورننس، نگرانی اور حکمتِ عملی کی سمت فراہم کرے گی اس حوالے سے اٴْس دن ایک مشاورتی ورکشاپ ’بینکوں کے لیے کیپیٹل مارکیٹ کے مواقع‘ کے عنوان سے منعقد ہوئی، فنڈ کا آغاز 18 اگست 2025 کو ہوا، جس کا افتتاح وفاقی وزیر خزانہ و ریونیو سینیٹر محمد اورنگزیب نے کیا۔