پنجاب پولیس کو جاپان پولیس کی طرز پر انفراریڈ اور الٹرا سانک ٹیکنالوجی سے لیس کرنے کا فیصلہ

کرائم کنٹرول ڈیپارٹمنٹ بننے کے بعد پنجاب میں جرائم کا گراف 70 فیصد سے بھی نیچے آچکا، وزیر اعلی

بدھ 20 اگست 2025 21:10

لاہور(اُردو پوائنٹ اخبارتازہ ترین - این این آئی۔ 20 اگست2025ء)وزیراعلی پنجاب مریم نواز نے پنجاب پولیس کو جاپان پولیس کی طرز پر انفراریڈ اور الٹرا سانک ٹیکنالوجی سے لیس کرنے کا فیصلہ کرلیا۔پنجاب پولیس کو ٹریفک مینجمنٹ ، حادثات پر قابو اور موسمیاتی صورتحال سے عوام کو پیشگی آگاہ کرنے کے نظام سے لیس کیا جائے گا اور پہلے مرحلے میں لاہور میں پائلٹ پراجیکٹ شروع کیا جائے گا۔

وزیراعلی مریم نواز دورہ جاپان سے واپسی پر منصوبے پر باضابطہ عملدرآمد کا آغاز کریں گی۔دورہ جاپان کے دوران مریم نواز نے ٹوکیو میں نیشنل پولیس ایجنسی ہیڈ آفس کا دورہ کیا اور مختلف شعبوں کا معائنہ کیا جبکہ اس دوران انہیں جاپان پولیس سسٹم کے نگران ادارے کے بارے میں بریفنگ دی گئی۔بریفنگ کے دوران بتایا گیا کہ نیشنل پولیس ایجنسی جاپان کے امپیریل گارڈز کی کارکردگی کی نگرانی کرتی ہے۔

(جاری ہے)

جاپان پولیس کے تمام محکمے نیشنل پولیس ایجنسی سے منسلک ہیں اور نیشنل پولیس ایجنسی جاپان پولیس کی محکمانہ پالیسیوں کا بھی تعین کرتی ہے جبکہ نیشنل پبلک سیفٹی کمیشن جاپان کی نیشنل پولیس ایجنسی کا نگران ہے۔نیشنل پولیس ایجنسی تمام دیگر سکیورٹی محکموں کو ہنگامی صورتحال اور قدتی آفات کے دوران رہنمائی فراہم کرتی ہے۔اس موقع پر گفتگو کرتے ہوئے وزیر اعلی کا کہنا تھا کہ جاپان میں امن وامان کی صورتحال قابل تقلید ہے اور پنجاب میں پولیس کو جدید خطوط پر استوار کر رہے ہیں جبکہ پنجاب پولیس کو پیشہ ورانہ انداز میں کام کرنے کی آزادی دی ہے۔

وزیر اعلی نے بتایا کہ پنجاب پولیس کی معاونت اور جرائم کے خاتمے کے لئے کرائم کنٹرول ڈیپارٹمنٹ کا نیا ادارہ قائم کیا ہے جس سے صوبے میں امن وامان کی صورتحال بہتر ہوئی۔مریم نواز نے دعوی کیا کہ کرائم کنٹرول ڈیپارٹمنٹ بننے کے بعد پنجاب میں پہلی مرتبہ جرائم کا گراف 70 فیصد سے بھی نیچے آچکاہے۔ان کا مزید کہنا تھا کہ امن اور ترقی میرا مشن ہے۔