پاکستان بار کونسل نے انسداد دہشتگردی ایکٹ میں حالیہ ترامیم مسترد کردیں

جھوٹی ایف آئی آرز واپس نہ ہوئیں تو ہر سطح پر مزاحمت کی جائے گی ، اعلامیہ

بدھ 20 اگست 2025 21:30

اسلام آباد (اُردو پوائنٹ اخبارتازہ ترین - این این آئی۔ 20 اگست2025ء) پاکستان بار کونسل کی رولز کمیٹی نے انسداد دہشتگردی ایکٹ میں حالیہ ترامیم مسترد کردیں۔جاری اعلامئے کے مطابق اجلاس میں متعدد قراردادیں منظور کی گئی ہیں۔رولز کمیٹی نے کہا ہے کہ تین ماہ تک مشتبہ افراد کو حراست میں رکھنے کا اختیار آئینی حقوق کے منافی ہے جبکہ لیگل پریکٹیشنرز اینڈ بار کونسلز ایکٹ میں مجوزہ ترمیم بھی متفقہ طور پر مسترد کر دی گئی۔

(جاری ہے)

اعلامئے میں کہا گیا ہے پنجاب میں وکلا کیخلاف جھوٹی ایف آئی آرز درج کرنے کی شدید مذمت کی جاتی ہے۔اعلامئے میں مطالبہ کیا گیا کہ آئی جی پنجاب غیر قانونی اور بے بنیاد ایف آئی آرز واپس لیں،جھوٹی ایف آئی آرز واپس نہ ہوئیں تو ہر سطح پر مزاحمت کی جائے گی ۔اجلاس میں حالیہ بارشوں اور سیلاب سے قیمتی جانوں اور املاک کے نقصان پر گہرے دکھ کا اظہار اور وفاقی و صوبائی حکومتوں سے متاثرین کی مدد کیلئے تمام وسائل بروئے کار لانے کا مطالبہ بھی کیا گیا۔