پنجاب میں وائلڈ لائف رینجرز نے نایاب جانور اور پرندے بازیاب کیے

جمعرات 21 اگست 2025 19:26

لاہور (اُردو پوائنٹ اخبارتازہ ترین - آن لائن۔ 21 اگست2025ء) سینئر وزیر مریم اورنگ زیب اور سیکرٹری جنگلات و جنگلی حیات و ماہی پروری پنجاب مدثر ریاض ملک کی ہدایت پر چیف وائلڈلائف رینجر مبین الٰہی کی قیادت میں صوبہ میں تحفظ شدہ جنگلی جانوروں اور پرندوں کی بازیابی کا سلسلہ جاری ہے۔متعدد کامیاب کارروائیوں کے دوران صوبہ کے مختلف اضلاع رحیم یار خان، ڈی جی خان اور مظفر گڑھ سے نایاب چنکارہ ہرن کے ایک بچے سمیت درجنوں بٹیر، فاختائیں، تیتر، چڑیاں اور دیگر پرندے بازیاب کر لیے گئے۔

ذمہ داران کے خلاف ایف آئی آرز اور چالان مرتب کر کے قانونی چارہ جوئی شروع کر دی گئی۔تفصیلات کے مطابق ڈپٹی چیف وائلڈلائف رینجر بہاولپور ریجن سید علی عثمان بخاری کی سربراہی میں وائلڈلائف رینجر رحیم یار خان نے عدالت سے سرچ وارنٹ حاصل کر کے مقامی پولیس کے تعاون سے ایک بدنام زمانہ شکاری کے گھر چھاپہ مارا۔

(جاری ہے)

موقع سے چنکارہ ہرن کا بچہ بازیاب کر کے ملزم کا چالان مرتب کیا گیا اور ملزم کو علاقہ مجسٹریٹ کی عدالت میں پیش کیا گیا، جہاں عدالت نے اسے 14 روزہ جوڈیشل ریمانڈ پر جیل بھیج دیا۔

چنکارہ ہرن کے بچے کو وائلڈلائف پارک رحیم یار خان منتقل کرنے کا حکم دیا گیا، جہاں اسے بکری کے دودھ کے ذریعے خصوصی نگہداشت فراہم کی جا رہی ہے۔ اس کے علاوہ ناجائز شکار بٹیر پر بہاولپور میں 5 چالان کر کے 37 ہزار روپے جرمانہ کیا گیا۔اسی طرح ڈپٹی چیف وائلڈلائف رینجرز ڈی جی خان ریجن سخی محمد جوئیہ کی سربراہی میں وائلڈلائف رینجرز نے ڈی جی خان اور مظفرگڑھ میں ناجائز قبضہ پرندگان کے 4 ملزمان کو گرفتار کیا، اور 30 زندہ بٹیر، 5 فاختائیں، 5 چڑیاں، 2 تیتر اور 2 فینسی برڈز برآمد کر کے ایک لاکھ 46 ہزار روپے محکمانہ معاوضہ کی مد میں جرمانہ کیا۔

اسی طرح اسسٹنٹ چیف وائلڈلائف رینجر ضلع خانیوال منور حسین نجمی نے اپنی ٹیم کے ہمراہ ناجائز شکار بٹیر کے 3 ہنٹنگ گیئرز برآمد کر کے ملزم کے خلاف ایف آئی آر درج کروا دی۔