غذر میں گلیشیئر پھٹنے سے سیلاب، متعدد دیہات زیر آب، امدادی کارروائیاں جاری

سیلاب سے لوگوں کو بھاری مالی نقصان پہنچا ہے، کسی جانی نقصان کی اطلاع نہیں ملی، ترجمان جی بی حکومت

فیضان ہاشمی جمعہ 22 اگست 2025 10:50

غذر میں گلیشیئر پھٹنے سے سیلاب، متعدد دیہات زیر آب، امدادی کارروائیاں ..

غذر (اُردو پوائنٹ اخبارتازہ ترین۔ 22 اگست2025ء) گلگت بلتستان کے ضلع غذر میں گلیشیئر پھٹنے ایک بار پھر سے سیلاب آگیا ، متعدد دیہات پانی میں ڈوب گئے جبکہ گاؤں راؤشن کی آبادی محصور ہو کر رہ گئی۔ درجنوں افراد پھنس گئے جن میں سے 50 سے زائد کو بحفاظت ریسکیو کر لیا گیا۔ گلگت بلتستان حکومت کے ترجمان فیض اللہ کے مطابق سیلاب سے لوگوں کو بھاری مالی نقصان پہنچا ہے، تاہم خوش قسمتی سے کسی جانی نقصان کی اطلاع نہیں ملی۔

ترجمان جی بی حکومت نے کہا کہ امدادی کارروائیاں جاری ہیں، انتظامیہ، ریسکیو 1122 اور ڈیزاسٹر مینجمنٹ کے افراد موقع پر موجود ہیں۔ قبل ازیں ضلعی حکام نے بتایا کہ غذر میں گلیشیئر پھٹنے سے شدید لینڈ سلائیڈنگ ہوئی جس سے دریائے غذر کا بہاؤ مکمل طور پر رک گیا ، کئی بستیاں سیلاب سے متاثر ہو رہی ہیں، عطا آباد جھیل جیسی صورتحال پیدا ہو گئی ہے مگر کوئی جانی نقصان نہیں ہوا۔

(جاری ہے)

ضلعی انتظامیہ کا کہنا ہے کہ لینڈسلائیڈنگ سے گلگت شندور روڈ مکمل طور پر بند ہو گیا ہے، تالی داس نالہ میں لینڈ سلائڈنگ دو اطراف سے ہوئی، تودے سے راؤشن گاؤں کی آبادی محصور ہوگئی۔ وزیر داخلہ گلگت بلتستان شمس لون کا کہنا ہے کہ سیلاب نے غذر میں ایک بار پھر تباہی مچا دی ہے تاہم ابھی تک کوئی جانی نقصان نہیں ہوا ہے، کچھ لوگوں کے پھنسنے کی اطلاع ہے جنہیں ریسکیو کیلئے ہیلی کاپٹر طلب کیا گیا ہے، کمانڈر ایف سی این اے کی طرف سے ہنگامی بنیادوں پر ہیلی کاپٹر روانہ کر دیا گیا ہے۔

غذر پولیس نے تصدیق کی ہے کہ سیلاب سے گاؤں راؤشن میں 50 افراد پھنسے ہوئے ہیں۔ ایڈیشنل ڈپٹی کمشنر غذر نے بتایا ہے کہ تالی داس راؤشن میں لینڈ سلائیڈ نگ کے باعث رات 3 بجے سے دریائے غذر مکمل بند ہے، دریائے غذر بند ہونے سے مزید آبادیاں سیلابی پانی کے کٹاؤ کی زد میں آ رہی ہیں، لوگوں کو بروقت اطلاع دی گئی جس سے کوئی جانی نقصان نہیں ہوا۔