علیمہ خان کے بیٹے پر 2 کم سن بچوں کے سامنے زبردستی کمرے میں گھس کر تشدد کیا گیا

لاہور (اُردو پوائنٹ اخبارتازہ ترین۔ 21 اگست2025ء) تحریک انصاف نے الزام عائد کیا ہے کہ علیمہ خان کے بیٹے پر 2 کم سن بچوں کے سامنے زبردستی کمرے میں گھس کر تشدد کیا گیا، مسلح افراد دروازے توڑ کر شاہریز خان کو بیڈ روم سے اغوا کر کے لے گئے۔ تفصیلات کے مطابق بانی تحریک انصاف عمران خان کی بہن علیمہ خان کے صاحبزادے کے مبینہ اغوا سے متعلق تحریک انصاف کی جانب سے ردعمل دیا گیا ہے۔

علیمہ خان کے بیٹے کا اغواء اور حملہ قابلِ مذمت اور شرمناک بزدلانہ حرکت قرار دیتے ہوئے تحریک اںصاف کے ترجمان نے کہا ہے کہ ہ مسلح افراد دروازے توڑ کر شاہریز خان کو بیڈ روم سے اغوا کر کے لے گئے، ملازمین پر بہیمانہ تشدد کیا گیا، شاہریز خان کے دو کم سن بچوں کے سامنے زبردستی کمرے میں گھس کر تشدد کیا گیا، یہ حکومتی دہشتگردی کی بدترین مثال ہے۔

(جاری ہے)

گزشتہ روز شاہریز خان کو اپنی اہلیہ کے ہمراہ لاہور ایئرپورٹ سے غیر قانونی طور پر آف لوڈ کیا گیا، شاہریز خان کا کسی سیاسی سرگرمی سے کوئی تعلق نہیں، صرف عمران خان کی بہن کا بیٹا ہونے کے باعث نشانہ بنایا گیا۔ یہ سب کچھ مریم نواز اور ان کی فسطائی حکومت کے حکم پر ہو رہا ہے،تم بانی پی ٹی آئی کو جھکا نہیں سکے، اب اس کی بہنوں اور بچوں کو نشانہ بنا رہے ہو؟ ظلم جب حد سے بڑھتا ہے تو مٹ جاتا ہے۔

ترجمان پی ٹی آئی کا مزید کہنا تھا کہ پاکستان تحریک انصاف چیف جسٹس سے فوری نوٹس لینے اور شاہریز خان کو بازیاب کرانے کا مطالبہ کرتی ہے، اگر شاہریز خان کو بازیاب نہ کیا گیا تو عوامی غیظ و غضب کا طوفان روکنا کسی کے بس میں نہیں ہوگا۔ دوسری جانب علیمہ خان نے بیٹے کے اغوا کی تصدیق کر دی۔ بانی پی ٹی آئی کی ہمشیرہ علیمہ خان نے الزام عائد کیا ہے کہ 4مسلح نقاب پوش میرے بیٹے شاہریز کو اغوا کرکے لے گئے۔

میڈیا سے گفتگو کرتے ہوئے علیمہ خان نے کہا کہ بیٹے شاہریز کو لاہور میں میرے گھر سے اغوا کیا گیا، سادہ کپڑوں میں ملبوس 4مسلح افراد کچن کے راستے گھر میں داخل ہوئے، میرا بیٹا اپنی بیوی اور والد کے ہمراہ گھر کی بالائی منزل پر تھا جسے اغواء کرلیا گیا۔ انہوں نے الزام عائد کیا کہ مسلح افراد نے اہل خانہ کو بھی ہراساں کیا اور گھر کے ملازمین کو مارا پیٹا۔ اس سے قبل تحریک انصاف کے سیکرٹری جنرل سلمان اکرم راجہ کی جانب سے بتایا گیا ہے کہ سادہ کپڑوں میں ملبوس افراد نے علیمہ خان کے گھر پر دھاوا بولا اور ان کے صاحبزادے کو اغا کر لیا گیا۔ اس دوران علیمہ خان کے دیگر اہل خانہ اور ملازمین کو تشدد اور ہراسگی کا نشانہ بھی بنایا گیا۔