بھارت، بیٹی کی پہلی سالگرہ منانے کے دوران عمارت گر گئی، خوشی کی تقریب ماتم میں بدل گئی

جمعرات 28 اگست 2025 14:56

نئی دہلی (اُردو پوائنٹ اخبارتازہ ترین - این این آئی۔ 28 اگست2025ء) بڑے شہروں میں بڑھتی آبادی اور رہائش کی طلب نے ایسی غیر قانونی تعمیرات کو جنم دیا ہے جو قانونی تقاضوں پر پورا نہیں اترتیں۔ ناقص مٹیریل اور کمزور ڈھانچے کے باعث یہی عمارتیں اکثر خوفناک حادثات کا سبب بنتی ہیں۔جگہ کی کمی اور قوانین کی خلاف ورزی سے وجود میں آنے والی یہ عمارتیں بظاہر تو سہولت فراہم کرتی ہیں لیکن حقیقت میں جان لیوا خطرات اپنے اندر سمیٹے ہوتی ہیں۔

ایسی ہی ایک اندوہناک مثال حال ہی میں سامنے آئی جب ایک غیر قانونی عمارت اچانک منہدم ہو گئی اور ایک خوشی کا موقع لمحوں میں ماتم میں بدل گیا۔بھارت میں نصف شب ایک غیر قانونی چار منزلہ عمارت کا پچھلا حصہ اچانک منہدم ہوگیا، جس کے نتیجے میں کم از کم 15 افراد ہلاک اور کئی زخمی ہوگئے۔

(جاری ہے)

حادثے سے کچھ ہی دیر قبل ایک جوڑا اپنی ایک سالہ بچی کی سالگرہ منا رہا تھا۔

گھر میں غبارے اور روشنیوں سے سجاوٹ کی گئی تھی، کیک کاٹا گیا اور تصاویر لی گئیں، لیکن خوشی کے چند منٹ بعد پوری عمارت زمین بوس ہوگئی۔ ماں اور بچی موقع پر ہی جاں بحق ہوگئیں جبکہ والد کے بارے میں تاحال کچھ پتہ نہیں چل سکا۔حکام کے مطابق یہ عمارت سنہ 2012 میں تعمیر کی گئی تھی اور اس میں پچاس فلیٹ تھے، جن میں سے بارہ فلیٹ متاثرہ حصے میں شامل تھے۔

مقامی میونسپل کارپوریشن نے تصدیق کی کہ یہ تعمیر غیر قانونی تھی۔ریسکیو ٹیموں نے فوری کارروائی شروع کی، لیکن تنگ جگہ ہونے کی وجہ سے بھاری مشینری بروقت نہیں پہنچ سکی اور ابتدائی مرحلہ ہاتھوں سے ملبہ ہٹا کر کیا گیا۔ اب تک 15 افراد کی ہلاکت کی تصدیق ہو چکی ہے جبکہ متعدد زخمی اسپتالوں میں زیر علاج ہیں۔ادھر متعلقہ حکام نے بلڈر کو گرفتار کرلیا ہے اور آس پاس کی عمارتوں کو خالی کرا کے متاثرہ خاندانوں کو قریبی کمیونٹی ہال میں عارضی پناہ فراہم کی گئی ہے، جہاں کھانے پینے اور طبی سہولتیں مہیا کی جا رہی ہیں۔

یہ واقعہ علاقے میں غیر قانونی تعمیرات کے باعث پیش آنے والا دوسرا جان لیوا حادثہ ہے، اس سے محض دو ہفتے پہلے بھی ایک واقعے میں دو مزدورشیشے کا سلیب گرنے سے اپنی جانوں سے ہاتھ دھو بیٹھے تھے۔