Live Updates

حکومتی غفلت سے کوئی جان نہیں گئی، اقدامات نہ کیے ہوتے تو سیلاب سے جانی نقصان زیادہ ہوتا، مریم نواز

دریاؤں میں گنجائش سے زائد پانی آیا جس کی توقع نہیں تھی، میں نے اپنی پوری زندگی میں راوی میں اتنا پانی نہیں دیکھا؛ وزیراعلیٰ پنجاب کی گفتگو

ساجد علی جمعرات 28 اگست 2025 14:18

حکومتی غفلت سے کوئی جان نہیں گئی، اقدامات نہ کیے ہوتے تو سیلاب سے جانی ..

لاہور ( اُردو پوائنٹ اخبارتازہ ترین۔ 28 اگست 2025ء ) وزیراعلیٰ پنجاب مریم نواز کا کہنا ہے کہ حکومتی غفلت سے کوئی جان نہیں گئی اگر بروقت اقدامات نہ کیے جاتے تو سیلاب سے جانی نقصان زیادہ ہوتا۔ تفصیلات کے مطابق وزیراعلیٰ پنجاب مریم نواز کشتی میں سوار ہو کر دریائے راوی میں شاہدرہ کے مقام پر سیلابی صورتحال کا جائزہ لینے پہنچ گئیں جہاں انہوں نے کشتی میں سوار ہو کر سیلابی صورتحال کا جائزہ لیا، اس دوران حکام کی جانب سے انہیں دریائے راوی میں سیلاب کی تازہ ترین صورتحال پر بریف کیا گیا۔

اس موقع پر میڈیا سے گفتگو کرتے ہوئے وزیراعلیٰ پنجاب نے کہا کہ ہمارے 3 دریاؤں پر پانی کا شدید دباؤ ہے، میں لاہور میں پیدا ہوئی، لاہور میں پلی بڑھی لیکن میں نے اپنی پوری زندگی میں راوی میں اتنا پانی نہیں دیکھا، ہمارے دریاؤں میں گنجائش سے زائد پانی آیا جس کی توقع نہیں تھی، پنجاب کی انتظامیہ نے 50 ہزار لوگوں کو محفوظ مقامات پر پہنچایا ہے اور سیلابی صورتحال میں انتظامی غفلت کی وجہ سے کوئی جان نہیں گئی، سیلاب متاثرین کے نقصانات کا ازالہ کریں گے، جن لوگوں نے آبی راستوں میں اپنے گھر بنا لیے ہیں ان کو ہٹائیں گے۔

(جاری ہے)

مریم نواز کا کہنا ہے کہ نارووال مکمل ڈوبا ہوا ہے، گجرات اور سیالکوٹ میں بری صورتحال ہے تاہم انتظامیہ نے لوگوں کی مدد کی جس پر تمام ڈی سیز ، سول ڈیفنس اور ریسکیو اداروں کو شاباش دیتی ہوں، ہمیں اپنے انفرا اسٹرکچر، واٹر اسٹوریج اور ڈیمز بنانا چاہئیں کیوں کہ پانی تو اللہ کی ایک نعمت ہے، اس پانی پانی کو ذخیرہ کرنے کے لیے اسٹرکچر بنانا بہت ضروری ہے، تمام متعلقہ اداروں سے کہا ہے پروگرام بنا دیں کہ بارش کے پانی کو کیسے ہارویسٹ کرسکتے ہیں اور سیلابی پانی کو کس طرح سے ذخیرہ کیا جاسکتا ہے۔