Live Updates

اگر ڈیم ہوتے بھی تو ہمیں سیلاب کی آفت سے نہیں بچا سکتے تھے، شرجیل میمن

لوگوں نے دریاؤں کے راستے میں ہاؤسنگ سوسائٹیاں بنائی ہوئی ہیں، گھر بنائے ہوئے ہیں یہ تباہی کو دعوت دے رہے ہیں؛ سینئر صوبائی وزیر سندھ کی گفتگو

ساجد علی جمعرات 28 اگست 2025 17:05

اگر ڈیم ہوتے بھی تو ہمیں سیلاب کی آفت سے نہیں بچا سکتے تھے، شرجیل میمن

کراچی ( اُردو پوائنٹ اخبارتازہ ترین۔ 28 اگست 2025ء ) صوبہ سندھ کے سینئر وزیر شرجیل انعام میمن کا کہنا ہے کہ سندھ میں اب تک کوئی ہنگامی صورت حال نہیں، ملک میں موجودہ سیلابی صورتحال کو دیکھتے ہوئے سندھ حکومت نے تیاری مکمل کرلی اور کچے کے علاقوں میں رہائش پذیر افراد کو نکالنے کا کام شروع کردیا گیا۔ کراچی میں پریس کانفرنس کرتے ہوئے انہوں نے کہا کہ وزیر اعلیٰ سندھ سید مراد علی شاہ نے تمام انتظامیہ کو الرٹ کیا ہوا ہے، لوگوں کو محفوظ مقامات پر منتقل کرنا پڑا تو وہ بھی کریں گے، پروونشل ڈیزاسٹر مینجمنٹ اتھارٹی (پی ڈی ایم اے) نے انتظامات کر رکھے ہیں، حکومت سندھ نے حفاظتی اقدامات کیے ہیں، پنجاب میں سیلاب کی تباہ کاریوں کے بعد پیپلز پارٹی اور حکومت سندھ پنجاب حکومت کے ساتھ کھڑی ہے، ہم نے پنجاب اور خیبرپختونخواہ حکومت کو ہر قسم کی مدد دینے کی پیشکش کی ہے۔

(جاری ہے)

سینئر صوبائی وزیر کا کہنا ہے کہ چیئرمین پاکستان پیپلزپارٹی بلاول بھٹو زرداری اور گورنر پنجاب سمیت صوبائی پارٹی بھی پنجاب کے لوگوں کے ساتھ کھڑی ہے، بلاول بھٹو صوبائی وزرا سے رابطے میں ہیں، ملک میں موجودہ سیلابی صورتحال کو دیکھتے ہوئے سندھ حکومت نے تیاری مکمل کرلی ہے، وزیر آبپاشی جام خان شورو بھی دریائے سندھ کے اطراف علاقوں کا دورہ کر رہے ہیں، کچے کے علاقوں میں رہائش پذیر افراد کو نکالنے کا کام شروع کردیا ہے، کمشنرز اور ڈپٹی کمشنرز کو بھی ہدایات جاری کردی گئی ہیں۔

انہوں نے کہا کہ اگر کوئی ڈیم ہوتے بھی تو ہمیں سیلاب کی آفت سے نہیں بچا سکتے تھے کیوں کہ لوگوں نے دریاؤں کے راستے میں ہاؤسنگ سوسائٹیاں بنائی ہوئی ہیں، گھر بنائے ہوئے ہیں یہ تباہی کو دعوت دے رہے ہیں، تاہم سندھ میں فی الحال ایمرجنسی کی صورتحال نہیں ہے، پھر بھی صوبائی پی ڈی ایم اے نے انتظامات کیے ہوئے ہیں، وزیر اعلیٰ سندھ نے سیلابی صورتحال کو مانیٹر کرنے کے لئے سیل قائم کیا ہے۔