شاہ محمود قریشی کی ضمانت کی درخواستوں کی سماعت، 9مئی کے 4مقدمات کا ریکارڈ طلب

جمعرات 28 اگست 2025 22:55

لاہور(اُردو پوائنٹ اخبارتازہ ترین - این این آئی۔ 28 اگست2025ء)لاہور کی انسداد دہشت گردی کی عدالت نے 9مئی کو جلاؤ گھیراؤ کے 4مقدمات میں پی ٹی آئی رہنما شاہ محمود قریشی کی ضمانت کی درخواستوں کی سماعت کرتے ہوئے مقدمات کا ریکارڈ اور وکلا کو دلائل کے لیے طلب کر لیا۔

(جاری ہے)

انسداد دہشت گردی کی عدالت کے جج منظر علی گل نے کوٹ لکھپت جیل میں سماعت کی۔دوران سماعت پراسیکیوشن نے مقدمات کا ریکارڈ پیش کرنے کے لیے مہلت طلب کر لی اور عدالت کو بتایا کہ مقدمات کا ریکارڈ سپریم کورٹ بھجوایا ہوا ہے۔عدالت نے آئندہ سماعت پر مقدمات کا ریکارڈ اور وکلا کو دلائل کے لیے طلب کر لیا۔عدالت نے مزید سماعت 4ستمبر تک ملتوی کر دی۔واضح رہے کہ شاہ محمود قریشی 9مئی کے 3دیگر مقدمات میں بری ہو چکے ہیں۔