Live Updates

دریا کنارے بنے طاقتور شخصیات کے ریزورٹس بچانے کیلئے پوری بستیاں اجاڑ دی گئیں،مصدق ملک

ڈیمز ، کینالز کے معاملے پر صوبوں کے درمیان شک کی فضا ہے،تحصیل ،ڈسٹرکٹ لیول پر پانی کے ذخائر نہیں ہوں گے تو کیا کریں گی ،وفاقی وزیر

جمعہ 29 اگست 2025 12:00

ْاسلام آباد(اُردو پوائنٹ اخبارتازہ ترین - این این آئی۔ 29 اگست2025ء)وفاقی وزیر موسمیاتی تبدیلی سینیٹر مصدق ملک نے کہاہے کہ ملک میں ایلیٹ کلچرنگ ہے، دریا کنارے طاقتور شخصیات کے ریزورٹ ہیں جہیں بچانے کیلئے پوری پوری بستیاں اجاڑ دی گئیں۔نجی ٹی وی کے پروگرام میں گفتگوکرتے ہوئے سینیٹر مصدق ملک نے کہاکہ ڈیمز اور کینالز کے معاملے پر صوبوں کے درمیان شک کی فضا ہے،ہر صوبے کو دوسرے صوبے پر شک ہے کہ وہ میرا پانی روک لے گا، بلوچستان کو شک ہے، سندھ کو پانی ملتا ہے اور سندھ انہیں پانی نہیں دیتا۔

انہوں نے کہا کہ ڈیمز اور کینالز کے معاملے پر بات کی جائے تو اتفاق رائے نہیں ہوتا، صوبوں کے درمیان شک کی فضا ختم کرنے کا حل ٹیلی میٹری ہے جس پر کام شروع ہو چکا ہے، ایک آدھ سال میں ٹیلی میٹری کا کام مکمل ہونے کی توقع ہے۔

(جاری ہے)

ایک سوال کے جواب میں سینیٹر مصدق ملک نے کہاکہ دریا کے اندر لوگوں نے کھیتی باڑی کی ہوئی ہے، ملک میں ایلیٹ کلچرنگ ہے، دریا کے کنارے کسی غریب کا ہوٹل نہیں، ہر طاقتور آدمی کا ریزورٹ ہے، 10 لوگوں کے ریزورٹس کو بچانے کے لیے پوری پوری بستیاں اجاڑ دی گئیں۔

وفاقی وزیر موسمیاتی تبدیلی نے کہا کہ سیلاب سے سرگودھا بھی متاثر ہوا، جب پنجند پر تمام دریا جب اکٹھے ہوں گے تو توقع ہے کہ ریلا 10 لاکھ کیوسک تک ہو گا۔انہوں نے بتایا کہ پیشگی اطلاعات پر لوگوں اور مویشیوں کو نکالا جاتا ہے، ایک گاؤں میں 30 لوگ کہہ رہے تھے کہ ہم نہیں جائیں گے، منت کرکے انہیں نکالا، آج وہاں پانی موجود ہے۔مصدق ملک نے کہاکہ تحصیل اور ڈسٹرکٹ لیول پر اگر پانی کے ذخائر نہیں ہوں گے تو آپ کیا کریں گی ہمیں ہر جگہ پر پانی کے نیچرل ریزرو بنانا پڑیں گے۔