نوجوانوں کو دیانتداری، محنت اور حب الوطنی کے ساتھ ملک کے مستقبل کی ذمہ داری قبول کرنی چاہیے ،اسلامیہ یونیورسٹی بہاولپور میں سیمینار سے مقررین کا خطاب

جمعہ 29 اگست 2025 22:10

بہاولپور (اُردو پوائنٹ اخبارتازہ ترین - اے پی پی۔ 29 اگست2025ء) اسلامیہ یونیورسٹی بہاولپور کے شعبہ انفارمیشن مینجمنٹ، سر صادق محمد خان لائبریری اور فاطمہ جناح ویمن لیڈرشپ سنٹر نے مشترکہ طور پر پاکستان کے یوم آزادی اور نوجوانوں کے عالمی دن کے حوالے سے ایک سیمینار کا انعقاد کیا۔ یہ تقریب جناح کارنرسر صادق محمد خان لائبریری میں ہوئی اور اس میں طلباء، فیکلٹی ممبران اور ملازمین نے شرکت کی۔

سیمینار میں نظامت کے فرائض نائلہ شمس الحق نے سرانجام دیئے جنہوں نے شرکاء کو خوش آمدید کہا اور تقریب کی اہمیت پر روشنی ڈالی۔ تقریب کی مہمان خصوصی ڈین فیکلٹی آف سوشل سائنسز پروفیسر روبینہ بھٹی نے نوجوانوں کے لیے قائداعظم کے پیغام کا اعادہ کرتے ہوئے متاثر کن خطاب کیا۔

(جاری ہے)

انہوں نے اس بات پر زور دیا کہ نوجوانوں کو دیانتداری، محنت اور حب الوطنی کو برقرار رکھتے ہوئے ملک کے مستقبل کی ذمہ داری قبول کرنی چاہیے۔

انہوں نے قوم کی تعمیر میں نوجوانوں کے کردار اور پاکستان کے لیے قائداعظم کے وژن پر غور کرنےپر زور دیا۔ پروفیسر سلمان بن نعیم نے بانی پاکستان قائد اعظم محمد علی جناح کے وضع کردہ اتحاد، ایمان اور نظم و ضبط کے لازوال اصولوں پر روشنی ڈالی۔ انہوں نے نوجوانوں پر زور دیا کہ وہ ان اقدار کو اپنا کر ملک کی ترقی میں بامعنی کردار ادا کریں۔ علی ذوالقرنین ڈپٹی لائبریرین نے لائبریری سائنسز اور تعلیمی ترقی کے بارے میں اپنے نقطہ نظر کا اظہار کیا۔سیمینار نے کامیابی کے ساتھ حاضرین میں حب الوطنی اور حوصلہ افزائی کے جذبے کو فروغ دیا، جس سے ان میں پاکستان کی ترقی میں مثبت کردار ادا کرنے کے لیے نئے عزم کا اظہار ہوا۔