ڈی آئی جی پولیس کا ایگل اسکواڈ کو گاڑیوں اور موٹرسائیکلوںکے کاغذات چیک نہ کرنے کا حکم دینا خوش آئند ہے ، رحیم کاکڑ

جمعہ 29 اگست 2025 22:15

کوئٹہ(اُردو پوائنٹ اخبارتازہ ترین - این این آئی۔ 29 اگست2025ء)مرکزی انجمن تاجران بلوچستان رجسٹرڈ کے صدر عبدالرحیم کاکڑ ، حضرت علی اچکزئی ، میر یاسین مینگل، سعد اللہ اچکزئی ، حاجی ہاشم کاکڑ، ظفر کاکڑ، عبدالخالق آغا، عبدالعلی دمڑ ، ودان علی کاکڑ ، داد اچکزئی، جہانگیر لانگو، نقیب اللہ کاکڑ، عمر اچکزئی، سید عبدالطیف سمیت دیگر نے ڈی آئی جی پولیس کوئٹہ اعتزاز احمد گورایہ کی جانب سے ایگل اسکواڈ کے اہلکاروں اور پولیس کے جوانوں کو کاغذات چیک نہ کرنے کے فیصلے اور احکامات کا خیر مقدم کرتے ہوئے کہا ہے کہ تاجر برادری گزشتہ کئی عرصے سے ایگل اسکواڈ اور پولیس کی جانب سے رات کی تاریکی میں شہریوں کو روک کر موٹر سائیکلوں اور گاڑی سوار لوگوں کی تلاشی لینے اور کاغذات چیک کرنے کے بہانے ان سے رقم وصولی کرتے تھے جس کی وجہ سے آئے روز لڑائی جھگڑے کے واقعات پیش آرہے تھے ہم نے متعدد بار حکام بالا کو اس صورتحال سے آگاہ کیا تھا لیکن اس پر کوئی توجہ نہیں دی جارہی تھی گزشتہ دنوں ہم نے ایک پیغام جاری کیا تھا جس پر ڈی آئی جی پولیس کوئٹہ نے نوٹس لیتے ہوئے ایگل اسکواڈ اور پولیس اہلکاروں کو شہریوں کے موٹر سائیکلوں اور گاڑیوں کو روک ان کے کاغذات چیک کرنے اور تلاشی لینے سے منع کردیا ہے کیونکہ یہ کام ٹریفک پولیس کا ہے اور ٹریفک پولیس اہلکار موثر انداز میں گاڑیوں اور موٹر سائیکلوں کے کاغذات چیک کرتے ہیں ڈی آئی جی کا یہ اقدام خوش آئند ہے جس کا ہم خیر مقدم کرتے ہیں۔

(جاری ہے)

ایگل اسکواڈ اور پولیس اہلکار ان احکامات پر عملدرآمد کو یقینی بناکر شہریوں کو درپیش مشکلات سے چھٹکارا دلائیں شہری ٹریفک پولیس کے ساتھ تعاون کریں کیونکہ پولیس کی ذمہ داری ہے کہ وہ عوام کے جان و مال کے تحفظ کو یقینی بنائیں نہ کہ عوام اور تاجروں کے لئے اپنے فرائض کی بجا آوری کے دوران مشکلات پیدا کرے۔