چینی صدر کی دعوت پر وزیر اعظم شہباز شریف سرکاری دورہ پر چین روانہ

ہفتہ 30 اگست 2025 11:53

لاہور(اُردو پوائنٹ اخبارتازہ ترین - این این آئی۔ 30 اگست2025ء)چینی صدر شی جن پنگ کی دعوت پر وزیر اعظم محمد شہباز شریف سرکاری دورہ پر چین کیلئے لاہور سے تیانجن روانہ ہو گئے۔ نائب وزیر اعظم اور وزیر خارجہ اسحاق ڈار، وزیر اطلاعات عطا للہ تارڑ اور وزیر اعظم کے مشیر طارق فاطمی بھی ان کے ہمراہ ہیں ۔وزیر اعظم اپنے دورے میں 25 ویں شنگھائی تعاون تنظیم سربراہی اجلاس میں شرکت کریں گے۔

وزیر اعظم سربراہی اجلاس سے خطاب کریں گے، پاکستان کی خطے میں امن کی کوششوں، علاقائی روابط میں اضافے اور خطے کی عوام کی ترقی کے فروغ کے حوالے سے پاکستان کا موقف پیش کریں گے۔ وزیر اعظم خطے میں موجود ممالک پر موسمیاتی تبدیلی کے مضر اثرات بشمول بڑھتی ہوئی قدرتی آفات کے نئے چیلنجز پر روشنی ڈالیں گے۔

(جاری ہے)

وزیر اعظم سربراہی اجلاس میں شریک عالمی رہنمائوں سے ملاقاتیں بھی کریں گے۔

وزیرِ اعظم بعد ازاں چین کے دارالحکومت بیجنگ جائیں گے جہاں چینی صدر شی جن پنگ کی خصوصی دعوت پر چینی پیپلز وار آف ریزسسٹنس میں فتح کی 80 ویں سالانہ تقریبات میں شرکت کریں گے۔ وزیر اعظم شہباز شریف کی چینی صدر شی جن پنگ اور وزیر اعظم اعظم لی چیانگ سے دوطرفہ ملاقاتیں بھی ہوں گی۔وزیر اعظم چین پاکستان تجارتی تعلقات کے فروغ اور پاکستان میں چینی سرمایہ کاری میں اضافے کیلئے چین میں منعقدہ دوسری بزنس ٹو بزنس سرمایہ کاری کانفرنس کی صدارت بھی کریں گے۔وزیر اعظم شہباز شریف چینی کمپنیوں کے سربراہان سے ملاقاتیں کریں گے اور انہیں حکومت کی سرمایہ کار دوست پالیسیوں کے بارے میں آگاہی کے ساتھ ساتھ پاکستان میں سرمایہ کاری کی دعوت بھی دیں گے۔