Live Updates

کراچی میں آئندہ تین دن کے موسم کی پیش گوئی جاری، موسم جزوی طور پر ابر آلود اور مرطوب رہنے کا امکان

ہفتہ 30 اگست 2025 14:21

کراچی(اُردو پوائنٹ اخبارتازہ ترین - این این آئی۔ 30 اگست2025ء)شہر قائد میں آئندہ تین دن کے لیے موسم کی پیش گوئی جاری کردی گئی ہے ، جس میں بتایا گیا ہے کہ صوبے کے کن علاقوں میں بارش کے امکانات ہیں۔محکمہ موسمیات کے ارلی وارننگ سینٹر نے پیش گوئی کی ہے کہ کراچی میں آئندہ 3 روز کے دوران موسم جزوی طور پر ابر آلود اور مرطوب رہنے کا امکان ہے جب کہ سمندری ہوائیں مسلسل بحال رہیں گی۔

(جاری ہے)

اس دوران شہر کا زیادہ سے زیادہ درجہ حرارت 33 سے 35 ڈگری سینٹی گریڈ کے درمیان ریکارڈ کیا جا سکتا ہے۔صوبہ سندھ کے بیشتر علاقوں میں موسم گرم اور مرطوب رہنے کا امکان ظاہر کیا گیا ہے۔سیلابی صورتحال سے متعلق ادارے نے بتایا کہ گڈو بیراج میں درمیانے درجے کا بہا موجود ہے جب کہ سکھر اور کوٹری بیراج میں نچلے درجے کا سیلاب ہے۔ محکمہ موسمیات کراچی کے مطابق 4 سے 5 ستمبر کے دوران دریائے سندھ میں گڈو اور سکھر کے مقامات پر بہت بڑے پیمانے پر سیلاب آنے کا خدشہ ہے۔