Live Updates

بھارتی آبی جارحیت اور موسمیاتی تبدیلیوں کے اثرات کے چیلنجز سے نمٹا جا رہا ہے‘خواجہ سلمان رفیق

صوبائی وزیر و چیئرمین کابینہ کمیٹی برائے ڈیزاسٹر مینجمنٹ کا سیلابی صورتحال کا جائزہ لینے کیلئے ضلع قصور کا ہنگامی دورہ

ہفتہ 30 اگست 2025 18:05

لاہور (اُردو پوائنٹ اخبارتازہ ترین - این این آئی۔ 30 اگست2025ء) وزیر اعلیٰ پنجاب مریم نواز شریف کی ہدایت پر صوبائی وزیر خواجہ سلمان رفیق فیلڈ میں متحرک ہوگئے اور صوبائی وزیر صحت و چیئرمین کابینہ کمیٹی برائے ڈیزاسٹر مینجمنٹ خواجہ سلمان رفیق نے سیلابی صورتحال کا جائزہ لینے کیلئے ضلع قصور کا ہنگامی دورہ کیا ۔دورہ کے دوران چیئرمین کابینہ کمیٹی برائے ڈیزاسٹر مینجمنٹ کوڈپٹی کمشنر ضلع قصور عمران علی اور ڈی پی او محمد عیسیٰ نے زمینی صورتحال اور جاری امدادی کاروائیوں بارے تفصیلی بریفنگ دی ۔

خواجہ سلمان رفیق نے کہاکہ تمام محکمہ جات الرٹ ہیں اور کسی بھی ہنگامی صورتحال پر فوری ریسپانس کررہے ہیں،سیلاب متاثرین کے جان و مال کے تحفظ کیلئے افسران و عملہ متحرک ہیں۔

(جاری ہے)

صوبائی وزیر کو بریفنگ میں بتایا گیا کہ قصور کے 72 موضع جات متاثر، امدادی سرگرمیوں میں 74 کشتیاں پانی میں موجود ہیں۔تلوار پوسٹ، اتر سنگھ والا، کوٹھی فتح محمد میں آرمی اور پولیس کے 300 دستوں کی مدد سے لوگوں کا انخلاء یقینی بنایا جارہا ہے۔

اب تک 18 ہزار 308 افراد اور 36 ہزار 129 جانوروں کو محفوظ مقامات پر منتقل کیا جاچکا ہے۔صوبائی وزیر و چیئرمین کابینہ کمیٹی برائے ڈیزاسٹر مینجمنٹ خواجہ سلمان رفیق نے ضلعی انتظامیہ کو ہمہ وقت الرٹ رہنے کی ہدایت بھی کی ہے۔خواجہ سلمان رفیق نے مقامی نمائندوں اور سیلاب متاثرین سے ملاقات بھی کی۔ ملا قات کے دوران سیلاب متاثرین نے حکومت پنجاب اور ضلعی انتظامیہ کی جانب سے کئے گئے انتظامات پر اظہار اطمینان بھی کیا ہے ۔

صوبائی وزیر نے کہاکہ بھارتی آبی جارحیت اور موسمیاتی تبدیلیوں کے اثرات کے چیلنجز سے نمٹا جا رہا ہے۔جس کے بعد گنڈا سنگھ والا کے مقام پر پانی کا بہاؤ 2 لاکھ 53 ہزار 68 کیوسک ہو گیا۔سیلاب سے متاثرہ علاقوں کے لوگوں کو ریلیف کیمپس میں خوراک اور جانوروں کے چارے تقسیم کئے جا رہے ہیں۔ضلع قصور سنٹرل مانیٹرنگ روم، چونیاں، قصور اور پتوکی میں بڑے کیمپس فعال کر دیئے گئے ہیں۔

سیلاب متاثرین کو فلڈ ریلیف کیمپس میں رہائش، خوراک، پانی و دیگر سہولیات کی فراہمی کو بروقت یقینی بنایا جا رہا ہے۔حکومت پنجاب سیلاب متاثرین کی جان و مال کے تحفظ کیلئے دن رات کوشاں ہے۔چیئرمین کابینہ کمیٹی برائے ڈیزاسٹر مینجمنٹ نے کہاکہ عوام سے گزارش ہے کہ سیلاب زدہ اور نشیبی علاقوں میں آنے سے گریز کریں۔