سیکرٹری اوقاف ڈاکٹر طاہر رضا بخاری کا دورہ پاکپتن، ’’زونل ر حمة للعالمین ﷺ کانفرنس‘‘ سے خطاب

لاہور(اُردو پوائنٹ اخبارتازہ ترین - این این آئی۔ 31 اگست2025ء) سیکرٹری /چیف ایڈ منسٹریٹر اوقاف پنجاب ڈاکٹر طاہررضابخاری نے جامع مسجد دربار حضرت بابا فرید الدین مسعود گنج شکر ؒ پاکپتن میں منعقدہ ’’زونل رحمة للعالمین ﷺ کانفرنس‘‘سے خطاب کرتے ہوئے کہا کہ اُسوہ رسولﷺ کا پیغام یہ ہے کہ مصیبت میں گھرے لوگوں کی مدد کی جائے۔نبی رحمتﷺ نے انسانیت کی غمخواری کی تلقین فرمائی۔

رسول اکرمﷺ انسانیت کے لیے سراپا رحمت بن کر تشریف لائے۔ حکومتی سطح پر'' تقریباتِ رحمة اللعالمین ﷺ '' کے انعقاد سے سیرتِ طیبہﷺ کی ترویج اور تدریس میں مدد ملے گی۔اسوہ رسول ﷺ کی پیروی ہی سے عروج اور بلندی حاصل ہوسکتی ہے۔ نبی اکرم ﷺ نے دنیا میں وہ عظیم انقلاب بر پا کیاجس سے انسانیت کو ارتقا میسر آیا۔

(جاری ہے)

انہوں نے کہا کہ آپ ﷺ کے اسوہ پر عمل پیرا ہو کر آج بھی انسانیت فکری، نظریاتی، علمی و اخلاقی اعتبار سے اوج کمال تک پہنچ سکتی ہے اور ہمیں معاشرتی زندگی میں علم و آگہی، امن و سکون اور رواداری و بُردباری جیسی نعمت میسر آسکتی ہے۔

اس موقع پرد یگر مقررین،ورلڈ پیس مشن(امریکہ) کے سربراہ ڈاکٹر ظفر اقبال نوری،ڈسٹرکٹ پولیس آفیسر پاکپتن جاوید اقبال چدھڑ، زونل خطیب اوقاف پاکپتن ڈاکٹر مفتی محمد عمران انور نظامی، پیر معروف احمد کرخی، پیر غلام قطب الدین، ڈاکٹر بختیار احمد وٹو، ڈاکٹر محمد یار گوہر، مولانا کرامت علی، مولانا سردار احمد سردار، مولانا مظہر علی نقوی، پیر عامر فرید چشتی، مفتی محمد اکبر، قاری محمد اسلم چشتی، قاری سعید احمد عثمانی، مولانا عبد الکریم، قاری عبد الستار سعیدی اور مولانا ظہیر احمدبابر نے خطاب کرتے ہوئے کہا کہ دنیا میں مسلمان اگر عزت، عروج اور بلندی کے خواہش مند ہیں تو اس کے لیے اتباعِ رسول ﷺ کے بغیرکوئی راستہ نہیں۔

دریں اثناء سیکرٹری اوقاف نے ترقیاتی پراجیکٹ بابا فرید ؒکا جائزہ لیتے ہوئے کہا کہ وزیراعلی کے ویژن کے مطابق حضرت بابا فرید الدین مسعود گنج شکرؒ کے مزار کی توسیع کا عظیم منصوبہ زیر تعمیر ہے، جس میں سماع ہال، لنگرخانہ،سیمینار ہال،لائبریری اور صحن کی توسیع سمیت دیگر ترقیاتی کام شامل ہیں۔انہوں نے کہا کہ یہ منصوبہ اپنی طرزِ تعمیر کے اعتبار سے منفرد،شانداراور زائرین کے لیے بہترین سہولیات سے آراستہ اوراسلامی طرز ِ تعمیر کا شاہکار اورپنجاب کے مزارات کی ڈویلپمنٹ کی اہم ترین کڑی ہے۔

بعدازاں سیکرٹری اوقاف نے ایڈ منسٹریٹر اوقاف پاکپتن ضیاء المصطفیٰ و دیگر کے ہمراہ مزارشریف پرچادرپوشی اور فاتحہ خوانی کی۔ اس موقع پرمنیجر ز اوقاف محمد آفتاب خاں، خالد محمود،حسنین احمد،چیف انجینئر بلڈنگ ڈیپارٹمنٹ سنٹرل زون لاہور عباس ورک، سپرنٹنڈنٹ انجینئر بلڈنگ سرکل ساہیوال ذوالفقار تبسم،ایکسیئن بلڈنگ پاکپتن محمد مظہر و دیگر آفیسران بھی موجود تھے۔