Live Updates

پنجاب میں گرمیوں کی 3 ماہ تعطیلات کے بعد سکول کھل گئے، سیلاب زدہ علاقوں میں تاحال سکول بند

سیلاب سے متاثرہ علاقوں میں تعلیمی اداروں کو پناہ گاہوں کے طور پر استعمال کیا جارہا ہے ‘صوبے کے مختلف اضلاع میں سینکڑوں سکول وکالج بندرکھنے کا فیصلہ

میاں محمد ندیم پیر 1 ستمبر 2025 15:21

پنجاب میں گرمیوں کی 3 ماہ تعطیلات کے بعد سکول کھل گئے، سیلاب زدہ علاقوں ..

راولپنڈی(اردوپوائنٹ اخبارتازہ ترین-انٹرنیشنل پریس ایجنسی۔یکم ستمبر ۔2025 )پنجاب میں گرمیوں کی 3 ماہ تعطیلات کے بعد سکول کھل گئے تفصیلات کے مطابق راولپنڈی ڈویژن میں سرکاری اور نجی سکولوں میں تدریسی سرگرمیوں کا پیر سے پھر آغاز ہو گیا ، تعلیمی ادارے تین ماہ کی تعطیلات کے بعد کھلے ہیں سکولوں میں بچوں کی ہنسی خوشی واپسی ہو گئی، تعلیمی اداروں کی رونقیں بحال ہونے کے بعد طلبہ و طالبات خوشی خوشی سکولوں کا رخ کرتے دکھائی دئیے.

پنجاب میں سیلاب زدہ علاقوں میں تاحال سکول بند رہیں گے، ڈپٹی کمشنر منڈی بہاﺅالدین نے کہا ہے کہ پھالیہ میں چھٹیاں ختم ہو گئی ہیں لیکن کئی سکول و کالج تاحال بند رہیں گے، سیلاب سے متاثرہ علاقوں میں 17 سکول اور ایک کالج بند رہے گا .

(جاری ہے)

ڈی سی کے مطابق قادرآباد میں گرلز کالج اور ہائیر سیکنڈری سکول بند رہیں گے، 7 پرائمری اسکول تاحکم ثانی بند رہیں گے، 6 گورنمنٹ ایلیمنٹری سکول، 2 گرلز پرائمری اور 1 گرلز ایلیمنٹری سکول بند رکھنے کا فیصلہ کیا گیا ہے، سیلابی صورت حال کے باعث تدریسی عمل معطل رہے گا اور متعلقہ اداروں کو الرٹ کر دیا گیا ہے ادھر تاندلیانوالہ میں بھی سیلابی صورت حال کے باعث مختلف سرکاری سکول بند رکھنے کا فیصلہ کیا گیا ہے، ڈپٹی کمشنر فیصل آباد کی ہدایت پر 23 اسکول یکم سے 5 ستمبر تک بند رہیں گے، بند رہنے والے سکولوں میں 5 ریلیف کیمپس کے طور پر استعمال کیے جائیں گے.

بہاولنگر میں دریائے ستلج میں سیلاب کے پیش نظر 34 سکول غیر معینہ مدت تک بند رہیں گے، ڈپٹی کمشنر ذوالفقار احمد بھون نے سکولوں کی بندش کا نوٹیفکیشن جاری کر دیا، بند کیے گئے سکول دریائے ستلج بیلٹ سے ملحقہ علاقوں میں واقع ہیں، 10 اسکول منچن آباد، 6 بہاولنگر اور18 چشتیاں میں بند کیے گئے، جب کہ ضلع بھر کے دیگر سکول گرمیوں کی چھٹیوں کے بعد کھل گئے ہیں.