سید یوسف رضا گیلانی کا چلاس میں ہیلی کاپٹر حادثےمیں قیمتی جانوں کے ضیاع پر گہرے غم و افسوس کا اظہار

پیر 1 ستمبر 2025 18:05

اسلام آباد (اُردو پوائنٹ اخبارتازہ ترین - اے پی پی۔ 01 ستمبر2025ء) چیئرمین سینیٹ سید یوسف رضا گیلانی نے چلاس کے قریب تربیتی پرواز کے دوران پاک فوج کے ہیلی کاپٹر حادثے میں قیمتی جانوں کے ضیاع پر گہرے دکھ اور افسوس کا اظہار کیا ہے۔ حادثہ دوران پرواز تکنیکی خرابی کی وجہ سے ہوا ۔

(جاری ہے)

پیر کو سینیٹ سیکرٹریٹ سے جاری کردہ بیان کے مطابق انہوں نے اس المناک حادثے میں شہید ہونے والے آفیسرز اور جوانوں کو زبردست خراج عقیدت پیش کرتے ہوئے کہا کہ یہ بہادر سپوت مادر وطن کے تحفظ اور قوم کی سلامتی کے لیے اپنی جانوں کا نذرانہ پیش کرنے والے حقیقی ہیرو ہیں۔

چیئرمین سینیٹ نے شہداء کے اہل خانہ سے دلی ہمدردی اور تعزیت کا اظہار کرتے ہوئے کہا کہ پوری قوم دکھ کی اس گھڑی میں ان کے ساتھ کھڑی ہے۔ انہوں نے مزید کہا کہ شہداء کی لازوال قربانیاں وطن عزیز کے استحکام اور سلامتی کی ضمانت ہیں۔