Live Updates

وفاقی وزیر توانائی سردار اویس احمد خان لغاری سے اقوام متحدہ کے ریذیڈنٹ کوآرڈینیٹر محمد یحییٰ کی ملاقات

پیر 1 ستمبر 2025 17:54

اسلام آباد (اُردو پوائنٹ اخبارتازہ ترین - اے پی پی۔ 01 ستمبر2025ء) وفاقی وزیر توانائی سردار اویس احمد خان لغاری سے اقوام متحدہ کے ریذیڈنٹ کوآرڈینیٹر محمد یحییٰ نے ملاقات کی، ملاقات میں سیالکوٹ اور حافظ آباد سمیت سیلاب سے متاثرہ علاقوں کی صورتحال اور متاثرہ عوام خصوصاً کسانوں کو درپیش مشکلات پر تبادلہ خیال کیا گیا۔ترجمان پاور ڈویژن کے مطابق محمد یحییٰ نے کہا کہ پاکستان کا کاربن اخراج میں حصہ نہ ہونے کے برابر ہے لیکن اسے ماحولیاتی تبدیلی کے شدید نقصانات کا سامنا ہے۔

اس موقع پر انہوں نے سیلاب سے متاثرہ علاقوں میں جانی اور مالی نقصان پر افسوس کا اظہار کرتے ہوئے کہا کہ پاکستان کے لیے توانائی ٹرانزیشن ناگزیر ہے اور اقوام متحدہ تکنیکی و مالی معاونت فراہم کرنے کو تیار ہے تاہم ایک واضح قومی بیانیہ تشکیل دینا ضروری ہے۔

(جاری ہے)

انہوں نے مزید کہا کہ دنیا کے کئی ممالک نے توانائی کے شعبے میں ٹرانزیشن اور کلائمیٹ فنانسنگ کے لیے ٹھوس اقدامات کیے ہیں، گھانا نے کوئلے سے توانائی حاصل کرنے کی بجائے متبادل ذرائع پر منتقل ہونے کے لیے 8 ارب ڈالر کا مطالبہ کیا جبکہ نائیجیریا اور انڈونیشیا بھی کلائمیٹ فنڈز سے استفادہ کر رہے ہیں۔

وفاقی وزیر سردار اویس احمد خان لغاری نے کہا کہ پی پی ایم سی کا گرین فنانسنگ ڈویژن اور بین الوزارتی کمیٹی اس مقصد کے لیے فعال ہیں۔ انہوں نے کہا کہ پاکستان بغیر امداد کے بھی قابل تجدید توانائی کی طرف منتقل ہو رہا ہے، اقوام متحدہ سیلاب زدہ علاقوں میں ریسکیو اینڈ ریلیف کے کاموں میں قابل ستائش کردار ادا کر رہی ہے۔ وفاقی وزیر نے زور دیا کہ انفراسٹرکچر کی بحالی پرانی طرز پر نہیں بلکہ مستقبل کے چیلنجز کو مدنظر رکھتے ہوئے کی جائے۔اقوام متحدہ کے ریزیڈنٹ کوآرڈینیٹر محمد یحییٰ نے اتفاق کرتے ہوئے کہا کہ حکومت پاکستان کے ساتھ مل کر جامع "پوسٹ ڈیزاسٹر ایسیسمنٹ" ضروری ہے تاکہ پائیدار اور محفوظ ڈھانچے تشکیل دیئے جا سکیں۔