Live Updates

چیئرمین سینیٹ کا ملتان میں سیلاب زدہ علاقوں اورخیمہ بستیوں کا دورہ ، متاثرین کو اکیلا نہیں چھوڑیں گے، سید یوسف رضا گیلانی

پیر 1 ستمبر 2025 17:31

ملتان (اُردو پوائنٹ اخبارتازہ ترین - اے پی پی۔ 01 ستمبر2025ء) چیئرمین سینٹ سید یوسف رضا گیلانی نے سوموار کو ملتان کے سیلاب زدہ علاقوں قاسم بیلہ بستی لنگڑیال اور مظفر آباد کی نواحی بستیوں کا دورہ کیا اور فلڈ ریلیف کیمپوں میں ادویات کی دستیابی اور دیگر سہولیات کا جائزہ لیا۔ممبر قومی اسمبلی سید علی قاسم گیلانی،سید احمد مجتبیٰ گیلانی ،سیاسی رہنما ملک منظور ڈومرہ ،سیاسی وسماجی رہنماؤں سمیت ڈپٹی کمشنر ملتان وسیم حامد سندھو،سی پی او ملتان صادق علی ڈوگر اور ضلعی انتظامیہ کے دیگر افسران بھی ان کے ہمراہ تھے۔

سید یوسف رضا گیلانی قاسم بیلہ اور بستی لنگڑیال میں قائم خیمہ بستیوں میں سیلاب متاثرین سے ملے ،ان کی خیریت اور مسائل دریافت کئے۔انہوں نے مظفر آباد کے نواحی علاقوں کے مکینوں سے اپیل کی کہ سیلاب کی تباہ کاریوں سے بچنے اور انخلاء کےلئے وہ انتظامیہ سے تعاون کریں تاکہ ان کے بچوں اور مال مویشیوں کو بچایا جا سکے۔

(جاری ہے)

بعد ازاں میڈیا سے گفتگو کرتے ہوئے چیئرمین سینٹ سید یوسف رضا گیلانی نے کہا کہ پاکستان اور بالخصوص پنجاب میں سیلاب سے بہت لوگ متاثر ہوئے ہیں،اپنے گھروں کو چھوڑنا آسان نہیں ہوتا لیکن زندگی بچانے کےلئے یہ ضروری ہے کہ سیلاب زدہ علاقے کو وقتی طور پر چھوڑ دیا جائےتا کہ انسانی جانوں کو بچایا جا سکے۔

سید یوسف رضا گیلانی نے کہا کہ اگرچہ سیلاب سے پورے ملک کو شدید نقصان اٹھانا پڑا لیکن پنجاب کے علاقے شدید متاثر ہوئے ہیں،قومی یکجہتی کےلئے ضروری ہےکہ مصیبت کی اس گھڑی میں سیلاب متاثرین کا اجتماعی طور پر ساتھ دیا جائے۔چیئرمین سینیٹ نے مخیر حضرات سے اپیل کی کہ دکھ کی اس گھڑی میں گھر بار چھوڑنے والوں کی ہر طرح سے مدد کی جائے تاکہ ان کا حوصلہ بڑھایا جا سکے۔

انہوں نے میڈیا کے کردار کی تعریف کرتے ہوئے کہا کہ ہر مشکل وقت میں پاکستانی میڈیا نے ہمیشہ مثبت کردار ادا کیا جو قابل تعریف ہے،سیلاب سے متعلق لوگوں کی رہنمائی اور انہیں آگاہی فراہم کرنا ایک حوصلہ افزا اور شاندار عمل ہے۔سید یوسف رضا گیلانی نے دریائی علاقوں سے انخلاء کے عمل اور انتظامات پر مقامی انتظامیہ کی بھی تعریف کی۔