نامور اداکار انور علی 65 برس کی عمر میں انتقال کرگئے

کافی عرصہ پہلے انور علی نے شوبز کی دنیا کو خیرباد کہہ دیا تھا اور ان کا رجحان مکمل طور پر مذہب کی طرف ہوچکا تھا

منگل 2 ستمبر 2025 11:10

لاہور(اُردو پوائنٹ اخبارتازہ ترین - این این آئی۔ 02 ستمبر2025ء)سٹیج، ٹی وی اور فلم کے نامور اداکار انور علی انتقال کر گئے۔اداکار انور علی پھیپھڑوں اور گردوں کے عارضے میں مبتلا تھے، جو طویل علالت کے بعد خالق حقیقی سے جا ملے، ان کی عمر 65 برس تھی۔

(جاری ہے)

ذرائع کے مطابق معروف اداکار انور علی کی طبیعت شدید ناساز ہونے کے باعث چند روز قبل انہیں لاہور کے ایک نجی ہسپتال میں داخل کرایا گیا تھا، انہیں فالج اور دل کے مسائل بھی لاحق تھے، جن کے باعث وہ گزشتہ کچھ مہینوں سے علیل تھے۔

اداکار کے بیٹے نے بتایا کہ انور علی گزشتہ کئی ماہ سے مختلف طبی مسائل کا شکار تھے، تاہم حالیہ دنوں میں ان کی صحت کا بگڑنا اہل خانہ کے لیے تشویش کا باعث بنا۔انور علی کے ابابیل، ہوم سویٹ ہوم اور اندھیرا اجالا سمیت درجنوں ٹی وی ڈراموں نے عوام میں خاصی مقبولیت حاصل کی، تاہم کافی عرصہ پہلے انہوں نے شوبز کی دنیا کو خیرباد کہہ دیا تھا اور ان کا رجحان مکمل طور پر مذہب کی طرف ہوچکا تھا۔