Live Updates

دریائے راوی کے اندر غیر قانونی طور پر 12 ہزار کنالز پر ہاوسنگ سوسائٹی تعمیر کرنے والا مالک گرفتار

پنجاب کے محکمہ اینٹی کرپشن نے حالیہ سیلاب کے بعد دریائے راوی کے اطراف غیرقانونی ہاؤسنگ اسکیموں کے خلاف کریک ڈاؤن تیز کر دیا

محمد علی بدھ 3 ستمبر 2025 21:18

لاہور (اُردو پوائنٹ اخبارتازہ ترین۔ 03 ستمبر2025ء) دریائے راوی کے اندر غیر قانونی طور پر 12 ہزار کنالز پر ہاوسنگ سوسائٹی تعمیر کرنے والا مالک گرفتار ۔ تفصیلات کے مطابق پنجاب کے محکمہ اینٹی کرپشن نے حالیہ سیلاب کے بعد دریائے راوی کے اطراف غیرقانونی ہاؤسنگ اسکیموں کے خلاف کریک ڈاؤن تیز کر دیا۔ لاہور میں ایک بڑی کارروائی کے دوران 12 ہزارکنال پرقائم ایک غیرقانونی ہاؤسنگ اسکیم کے مالک کو گرفتارکرلیا گیا ہے۔

ڈائریکٹرجنرل اینٹی کرپشن سہیل ظفرچٹھہ نے انکشاف کیا کہ گرفتارملزم پر8 ارب روپے دبئی منتقل کرنے کا الزام ہے جبکہ اس منصوبے میں لاہورڈویلپمنٹ اتھارٹی (ایل ڈی اے) کے بعض افسران کی مبینہ ملی بھگت بھی سامنے آئی ہے۔ ڈی جی اینٹی کرپشن کے مطابق روڈا اورایل ڈی اے کو سمن جاری کرتے ہوئے تمام متعلقہ ہاؤسنگ اسکیموں کا ریکارڈ طلب کرلیا گیا ہے۔

(جاری ہے)

دریائے راوی کے اطراف بننے والی اسکیموں کی تفصیلات بھی حاصل کی جا رہی ہیں تاکہ سیلابی تباہ کاریوں کی وجوہات اورذمہ داروں کا تعین کیا جا سکے۔ تحقیقات کا دائرہ کار وسیع کر دیا ہے اور سادہ لوح افراد کو غیرقانونی ہائوسنگ سکیموں سے پیسے واپس دلائیں گے۔