ملک میں سونے کی قیمت بڑھ کر3 لاکھ 76 ہزار 700 روپے کی بلند ترین سطح پر پہنچ گئی

صرافہ مارکیٹوں میں سونے کی قیمت میں 6 ہزار روپے بڑا اضافہ ہوا، دس گرام سونے کی قیمت بھی 5 ہزار 144 روپے بڑھ گئی

ثنااللہ ناگرہ بدھ 3 ستمبر 2025 19:30

ملک میں سونے کی قیمت بڑھ کر3 لاکھ 76 ہزار 700 روپے کی بلند ترین سطح پر پہنچ ..

کراچی ( اردوپوائنٹ اخبار تازہ ترین۔ آئی پی اے۔ 03 ستمبر 2025ء ) عالمی مارکیٹ میں سونے کی قیمتوں میں اتار چڑھاؤ کا سلسلہ جاری ہے، عالمی منڈی میں سونے کے نرخ بڑھنے پر پاکستان میں بھی قیمتوں میں نمایاں اضافہ ہوگیا ہے۔ میڈیا رپورٹ کے مطابق عالمی مارکیٹ میں سونے کی قیمتوں میں اضافہ ہونے کے باعث پاکستان میں بھی سونے کی قیمت بڑھ گئی ہے۔ بڑے اضافے کے بعد فی تولہ سونے کی نئی قیمت بلند ترین سطح پر پہنچ گئی ہے۔

آج ملک کی صرافہ مارکیٹوں میں فی تولہ سونا 6 ہزار روپے مہنگا ہوا ہے، جس کے باعث فی تولہ سونے کی نئی قیمت بڑھ کر3 لاکھ 76 ہزار 700 روپے کی سطح پر پہنچ گئی ہے۔ اسی طرح دس گرام سونے کی قیمت بھی بڑھ گئی ہے۔ 10 گرام سونے کی قیمت میں 5 ہزار 144 روپے کا اضافہ ہوا ہے۔ نئی قیمت 3 لاکھ 22 ہزار 959 روپے کی سطح پر پہنچ گئی ہے۔

(جاری ہے)

عالمی مارکیٹ میں سونے کی قیمت 60 ڈالرز فی اونس اضافے کے بعد 3 ہزار540 ڈالرز فی اونس ہو گئی ہے۔

اسی طرح فی تولہ چاندی کی قیمت بھی 12 روپے بڑھ کر 4315 روپے کی سطح پر پہنچ گئی ہے۔ دوسری جانب پاکستان کی انٹربینک مارکیٹ میں امریکی ڈالر کے مقابلے میں پاکستانی روپے کی قدر میں اضافہ ریکارڈ کیا گیا ہے۔سٹیٹ بینک کے مطابق بدھ کو انٹربینک مارکیٹ میں امریکی ڈالر کے مقابلے میں پاکستانی روپے کی قدر میں 02 پیسے کا اضافہ ریکارڈ کیا گیا ہے جس کے بعد اس کی نئی قیمت 281 روپے 70 پیسے ہو گئی ہے۔

انٹربینک مارکیٹ میں سعودی ریال کی قدر 75 روپے 07 پیسے جبکہ بحرینی دینار کی قدر 747 روپے 22 پیسے رہی۔اسی طرح عمانی ریال کی انٹربینک مارکیٹ میں قدر 731 روپے 71 پیسے رہی، کویتی دینار کی قدر 920 روپے 91 پیسے اور قطری ریال کی قدر 77 روپے 28 پیسے ریکارڈ کی گئی۔دوسری جانب اوپن مارکیٹ میں امریکی ڈالر کی قیمت خرید 282 روپے 60 پیسے اور قیمت فروخت 283 روپے 40 پیسے ریکارڈ کی گئی۔