عید میلاد النبیﷺ کی آمد، رمضان المبارک اور عید الفطر کی ممکنہ تاریخوں کی بھی پیشن گوئی کر دی گئی

متحدہ عرب امارات کے فلکیاتی مرکز نے حسب رویت کئی ماہ قبل ہی ماہ مبارک کے آغاز کی ممکنہ تاریخ بتا دی

محمد علی بدھ 3 ستمبر 2025 19:18

عید میلاد النبیﷺ کی آمد، رمضان المبارک اور عید الفطر کی ممکنہ تاریخوں ..

دبئی (اُردو پوائنٹ اخبارتازہ ترین۔ 03 ستمبر2025ء) رمضان المبارک اور عید الفطر کی ممکنہ تاریخوں کی بھی پیشن گوئی کر دی گئی۔ تفصیلات کے مطابق پاکستان سمیت دنیا بھر میں عید میلاد النبیﷺ کی آمد کی تیاریاں زور و شور سے جاری ہیں۔ جبکہ عید میلاد النبیﷺ کی آمد کے بعد رمضان المبارک کی آمد میں بھی چند ماہ ہی باقی ہیں۔ متحدہ عرب امارات کے فلکیاتی مرکز نے حسب رویت کئی ماہ قبل ہی ماہ مبارک کے آغاز کی ممکنہ تاریخ بتا دی۔

متحدہ عرب امارات کے فلکیاتی مرکز کے مطابق آئندہ سال یعنی 2026 میں رمضان المبارک 1447 ہجری کا آغاز 18 فروری سے ہونے کا امکان ہے، یعنی 17 فروری کو رمضان المبارک کا چاند نظر آنے کا قوی امکان ہے۔ اسی طرح عید الفطر 19 مارچ 2026 کو ہونے کا امکان ہے۔ دوسری جانب پاکستان میں عید میلاد النبیﷺ پر عام تعطیل کا اعلان، وفاقی اور پنجاب حکومت نے 12 ربیع الاول کی عام تعطیل کا نوٹیفیکیشن جاری کر دیا۔

(جاری ہے)

عید میلاد النبیﷺکے موقع پر ملک بھر میں 12 ربیع الاول 6 ستمبرکو عام تعطیل ہوگی۔ وزیراعظم شہباز شریف کی منظوری سے کابینہ ڈویژن نے عام تعطیل کا نوٹیفکیشن جاری کر دیا۔ نوٹی فکیشن میں کہا گیا کہ عید میلاد النبی ﷺ کے موقع پر 6 ستمبر بروز ہفتہ چھٹی ہوگی۔پنجاب حکومت نے بھی ہفتہ 12 ربیع الاول کے موقع پر عام تعطیل کا اعلان کر دیا ہے۔ اس روز تمام سرکاری دفاتر بند رہیں گے جبکہ سول سیکرٹریٹ چونکہ پہلے ہی ہفتے کو بند ہوتا ہے، اس لیے وہاں معمول کے مطابق تعطیل ہوگی۔ صوبائی حکومت کے مطابق ہسپتالوں میں صرف ایمرجنسی سروسز فراہم کی جائیں گی جبکہ انتظامی دفاتر اور آؤٹ ڈور پیشنٹ ڈپارٹمنٹس بند رہیں گے۔