طلبہ و طالبات نے گرمیوں کی تعطیلات کےدوران پاکستان کے نمایاں سرکاری و نجی اداروں میں چھ ہفتے پرمشتمل انٹرن شپس پروگرام کامیابی سےمکمل کر لیا

منگل 2 ستمبر 2025 22:30

کوئٹہ (اُردو پوائنٹ اخبارتازہ ترین - اے پی پی۔ 02 ستمبر2025ء) یونیورسٹی آف تربت کے فیکلٹی آف بزنس اینڈ اکنامکس کے طلبہ و طالبات نے گرمیوں کی تعطیلات کے دوران پاکستان کے نمایاں سرکاری و نجی اداروں میں چھ ہفتے پر مشتمل انٹرن شپس پروگرام کامیابی سے مکمل کر لیا۔ ان اداروں میں اسٹیٹ بینک آف پاکستان، بلوچستان ریونیو اتھارٹی، چمن ڈرائی فروٹس، پاکستان سول ایوی ایشن اتھارٹی، این آر ایس پی، ایس پی او اور ڈارسن سیکیورٹیز کراچی شامل ہیں۔

فیکلٹی آف بزنس اینڈ اکنامکس نے طلبہ کو عملی تربیت فراہم کرنے پر تمام اداروں سے اظہارِ تشکر کرتے ہوئے کہا کہ یہ پروگرام طلبہ کو پیشہ ورانہ ماحول اور عملی کاروباری و انتظامی اصولوں کو سمجھنے میں مددگار ثابت ہوگا۔ ڈین فیکلٹی اور مینجمنٹ سائنسز، اکنامکس و کامرس ڈیپارٹمنٹس کے سربراہان نے اس تعاون کو سراہتے ہوئے کہا کہ ایسے اقدامات طلبہ کو عملی میدان میں اعتماد اور مہارت فراہم کرتے ہیں۔

(جاری ہے)

ڈین فیکلٹی نے انٹرن شپ پروگرام کے فوکل پرسن عطیہ، ڈاکٹر غلام جان اور سابق چیئرمین مینجمنٹ سائنسز نوروز خان کی کاوشوں کو خراجِ تحسین پیش کیا جنہوں نے پروگرام کے انتظامات میں کلیدی کردار ادا کیا۔اس موقع پر وائس چانسلر پروفیسر ڈاکٹر گل حسن نے کہا کہ تربت یونیورسٹی تعلیمی رہنمائی کے ساتھ صنعتی اداروں سے روابط کو فروغ دینے اور طلبہ کو انٹرن شپس، کاروباری و تخلیقی سرگرمیوں میں شامل کرنے کے لیے پرعزم ہے۔ انہوں نے کہا کہ یونیورسٹی نوجوانوں کی شخصیت سازی، فکری ارتقاء اور مثبت سماجی سرگرمیوں میں شمولیت کو یقینی بنا رہی ہے تاکہ وہ قومی یکجہتی، خود اعتمادی اور حب الوطنی کے جذبے سے سرشار ہو کر ذمہ دار شہری بن سکیں۔