Live Updates

دریائے راوی ،ستلج اور چناب میں شدید سیلابی صورتحال کے باعث 33 سو سے زائد موضع جات متاثر ہوئے، ریلیف کمشنر نبیل جاوید

بدھ 3 ستمبر 2025 14:00

لاہور (اُردو پوائنٹ اخبارتازہ ترین - اے پی پی۔ 03 ستمبر2025ء) پی ڈی ایم اے پنجاب کی دریائے راوی ستلج اور چناب میں سیلاب کے باعث ہونے والے نقصانات کی رپورٹ جاری کردی ، پنجاب کے دریائوں میں شدید سیلابی صورتحال کے باعث 33 سو سے زائد موضع جات متاثر ہوئے۔ ریلیف کمشنر نبیل جاوید نے رپورٹ کی تفصیل بتاتے ہوئے کہا کہ دریائوں میں سیلابی صورتحال کے باعث مجموعی طور پر 33 لاکھ 63 ہزار لوگ متاثر ہوئے۔

سیلاب میں پھنس جانے والے 12 لاکھ 92 ہزار لوگوں کو محفوظ مقامات پر منتقل کیا گیا۔شدید سیلاب سے متاثرہ اضلاع میں 405 ریلیف کیمپس قائم کیے گئے ہیں۔ سیلاب سے متاثر ہونے والے اضلاع میں 425 میڈیکل کیمپس بھی قائم کیے گئے ہیں۔ ریلیف کمشنر نے کہا کہ مویشیوں کو علاج معالجے کی سہولت فراہم کرنے کے لیے 385 ویٹرنری کیمپس قائم کیے گئے ہیں۔

(جاری ہے)

متاثرہ اضلاع میں ریسکیو وہ ریلیف سرگرمیوں میں7 لاکھ 99 ہزار جانوروں کو محفوظ مقامات پر منتقل کیا گیا۔

ریلیف کمشنر نے کہا کہ منگلا ڈیم 83 فیصد جبکہ تربیلا ڈیم 100 فیصد تک بھر چکا ہے۔دریائے ستلج پر موجود انڈین بھاکڑا ڈیم 84 فیصد تک بھر چکا ہے۔پونگ ڈیم 98 فیصد جبکہ تھین ڈیم 92 فیصد تک بھر چکا ہے۔ریلیف کمشنر نے کہا کہ حالیہ سیلاب میں ڈوبنے سے 43 شہری جاں بحق ہوئے۔ انہوں نے کہا کہ وزیر اعلی پنجاب کی ہدایات کے پیش نظر شہریوں کے نقصانات کا ازالہ کیا جائے گا۔

کسانوں کے نقصانات کا تخمینہ لگا کر ازالہ یقینی بنایا جائے گا۔نبیل جاوید نے کہا کہ گزشتہ 24 گھنٹوں میں پنجاب کے بیشتر اضلاع میں مون سون بارشیں ریکارڈ کی گئی۔ ضلع سیالکوٹ میں 101 ملی میٹر، گوجرانولہ 59، گجرات 48، نارووال 41، لاہور 14، مری 12، منڈی بہاوالدین 4، حافظ آباد 2 اور فیصل آباد 1 ملی میٹر تک بارش ریکارڈ کی گئی۔آ ئندہ 24 گھنٹوں میں پنجاب کے بیشتر اضلاع میں مون سون بارشوں کی پیشگوئی ہے۔