سندھ ہائیکورٹ کا چیئرمین میٹرک بورڈ کے بیک وقت 2 سرکاری عہدے رکھنے پر فریقین سے جواب طلب

غلام حسین سوہو نے ایف ڈی ای میں ریٹائرمنٹ کی درخواست دے کر فوری چیئرمین کا عہدہ سنبھالا، نیاعہدہ سنبھالنے کے لئے ریٹائرمنٹ کی درخواست کی منظوری کا انتظار بھی نہیں کیا . درخواست گزار

میاں محمد ندیم بدھ 3 ستمبر 2025 14:17

سندھ ہائیکورٹ کا چیئرمین میٹرک بورڈ کے بیک وقت 2 سرکاری عہدے رکھنے پر ..

کرا چی(اردوپوائنٹ اخبارتازہ ترین-انٹرنیشنل پریس ایجنسی۔03 ستمبر ۔2025 )سندھ ہائی کورٹ نے چیئرمین میٹرک بورڈ غلام حسین سوہو کے خلاف بیک وقت 2 سرکاری عہدے رکھنے کے کیس میں فریقین سے جواب طلب کر لیا ہے عدالت میں چیئرمین میٹرک بورڈ غلام حسین سوہو کے خلاف بیک وقت 2 سرکاری عہدے رکھنے کے کیس کی سماعت ہوئی. درخواست گزار کے وکیل نے عدالت کو بتایا کہ غلام حسین سوہو فیڈرل ڈائریکٹوریٹ آف ایجوکیشن میں تعینات تھے پھر غلام حسین سوہو کو 3 سال کے لیے چیئرمین میٹرک بورڈ تعینات کیا گیا.

(جاری ہے)

درخواست گزار کے وکیل نے عدالت کو بتایا کہ غلام حسین سوہو نے ایف ڈی ای میں ریٹائرمنٹ کی درخواست دے کر فوری چیئرمین کا عہدہ سنبھالا، نیاعہدہ سنبھالنے کے لئے ریٹائرمنٹ کی درخواست کی منظوری کا انتظار بھی نہیں کیا درخواست گزار کے وکیل نے عدالت کو بتایا کہ اسٹبلشمنٹ ڈویژن نے غلام حسین سوہو کو تاحال ریلیف آرڈر جاری نہیں کیا، چیئرمین میٹرک بورڈ نے 2 ماہ تک بیک وقت 2 اداروں سے تنخواہیں وصول کیں.

درخواست میں استدعا کی گئی کہ چیئرمین میٹرک بورڈ کی تقرری کو خلاف ضابطہ قرار دے کر معاملے کی شفاف انکوائری کا حکم دیا جائے اور چیئرمین میٹرک بورڈ کی تقرری کے نوٹیفکیشن کو درخواست پر فیصلہ ہونے تک معطل کیاجائے. عدالت نے ریمارکس دیتے ہوئے کہا کہ بیک وقت وفاقی اور صوبائی حکومت میں عہدہ رکھنے کا تنازع غور طلب ہے عدالت نے کہا کہ وفاقی اور صوبائی حکومت کے وکلا تفصیلی جواب کے ہمراہ عدالت میں پیش ہوں عدالت نے فریقین کونوٹس جاری کرتے ہوئے 10 ستمبر تک جواب طلب کرلیا.